Երևանի ավագանին արտահերթ նիստով ընդունեց քաղաքապետարանի շուրջ 2000 աշխատակիցների աշխատավարձի բարձրացման վերաբերյալ նախագիծը:
Նախագիծն ընդունվեց 34 կողմ և 2 դեմ ձայների հարաբերակցությամբ: Քաղաքապետ Հայկ Մարությանը, ինչպես նախապես հայտարարել էր, չմասնակցեց քվեարկությանը.
«Այս որոշումը վերաբերվում է կոնկրետ ինձ, արտացոլում է կոնկրետ իմ սկզբունքները, որը ես ամենախիստ ձևով պետք է իմ նկատմամբ պահեմ: Խնդրում են չածանցել սա այլ բաների հետ»,-ասաց Մարությանը:
Երևանի ավագանու «Իմ քայլը» խմբակցության անդամ, նախագծի համահեղինակ Արմեն Գալջյանն էլ վստահեցրեց, որ աշխատավարձերի բարձրացումը նպատակ ունի բարձրացնել քաղաքապետարանի գործունեության արդյունավետությունը.
«Աշխատավարձերի բարձրացումը հատուկ նպատակ է հետապնդում, այդ նպատակը քաղաքապետարանի գործունեության արդյունավետության բարձրացումն Է: Մեր աշխատակիցները պետք է աչալուրջ լինեն այս մասով, մենք, բարձրացնելով աշխատավարձը, հետապնդում ենք աշխատանքի արդյունքի բարձրացում: Եթե այդ արդյունքը չբարձրացնենք, ապա պետք է գնանք փոփոխությունների աշխատակիցների մասով»,-ասաց նա:
