Ուկրաինայի շուրջ ստեղծված իրավիճակի վերաբերյալ վերջին տասն օրերի կարևոր իրադարձությունները հակիրճ.Հենակետ

Ռազմական իրադրություն

• ՌԴ ՊՆ-ն հայտնել է, որ ռուսական ռազմաօդային ուժերը մեծ հեռահարության բարձր ճշգրտության զենքով մեծ քանակությամբ հարված է հասցրել ռազմական օդանավակայաններում հակառակորդի օբյեկտներին։ Ըստ տեղեկության, հարվածները հասել են իրենց նպատակին։ Հրամանատարական կետերը, ռադիոտեղորոշիչ կետերը, ուկրաինական ավիացիոն տեխնիկան, ինչպես նաև սպառազինությամբ ու զինամթերքով պահեստարանները խոցված են։ Հրթիռային հարվածների թիրախներից մեկը դարձել է Ուկրաինայի օպերատիվ օդանավակայանը Կիրովոգրադի շրջանում (Կրոպիվնիցկի)։

• Խարկովում հրթիռային հարված է հասցվել Ուկրաինայի ռազմարդյունաբերական համալիրի օբյեկտներին։ Հաղորդվում է նաև Դնեպրոպետրովսկի շրջանի Պավլոգրադ «Գերան» ԱԹՍ-ների մոտենալու մասին։

• Միայն մայիսին, բրիտանական հետախուզության տվյալներով, ռուս զինվորականները Ուկրաինայի տարածքում կիրառել են առնվազն 300 «Գերան» շարքի կամիկաձե անօդաչու թռչող սարք (փաստաթղթի բնօրինակում նշված է Shahed):

• Ուկրաինայի գլխավոր շտաբի տեղեկատվության համաձայն՝ հունիսի 6-ի գիշերը Ռուսաստանի օդատիեզերական ուժերի Տու-95ՄՍ ռազմավարական ռմբակոծիչները թևավոր հրթիռներով զանգվածային հարված են հասցրել Ուկրաինայի տարածքում և անմիջապես Կիևի թիրախներին: Արձանագրվել է առնվազն 35 հրթիռ։

• Հունիսի 5-ին Ուկրաինայի օդուժի Սու-25 գրոհիչը խոցվել է Խերսոնի շրջանում։ Հունիսի 6-ին Ուկրաինայի օդուժի Սու-27 և ՄիԳ-29 կործանիչները խոցվել են օդում։

• Հունիսի 9-ի գիշերը թևավոր հրթիռներով և կամիկաձե ԱԹՍ-ներով համակցված օդային հարված է հասցվել Ժիտոմիրի, Կիրովոգրադի, Լվովի, Ռովենսկի մարզերի և կենտրոնական ու Արևմտյան Ուկրաինայի այլ շրջանների թիրախներին:

• ՌԴ ՊՆ-ն հայտնել է, որ հարձակման տարբեր ուղղություններում ուկրաինական զորքերի ընդհանուր կորուստները մեկ օրում կազմել են մինչև 300 զինծառայող, 9 տանկ, որոնցից 4-ը Leopard 2-ը, 11 հետևակի մարտական մեքենա, այդ թվում՝ 5 Ամերիկյան Bradley, 14 մարտական զրահապատ մեքենա, 6 ավտոմեքենա, ինչպես նաև ֆրանսիական արտադրության CAESAR ինքնագնաց հրետանային կայանք։ Հունիսի 10-ի ընթացքում հատուկ ռազմական գործողության անցկացման գոտում օդում խոցվել է Ուկրաինայի օդուժի ՄիԳ-29 կործանիչը:

• Ռազմական օգնության նոր փաթեթի շրջանակներում Կանադան նախատեսում է Ուկրաինային փոխանցել Ռուսաստանից առգրավված Ան-124-100 տրանսպորտային ինքնաթիռը:

• Ըստ տեղի բնակիչների, Չեչնիայից Բելգորոդի մարզի՝ Ուկրաինային սահմանակից շրջաններ է տեղափոխվել «Ախմատ» հատուկ նշանակության ջոկատը:

• ՌԴ ՊՆ-ն հայտնում է, որ երկուշաբթի օրը՝ հունիսի 12-ին ՌԴ ԶՈւ ծովային բազավորման մեծ հեռահարության բարձր ճշգրտության զենքով հարված է հասցվել Ուկրաինայի զինված ուժերի պահուստների տեղակայման վայրերին: Վրեմևսկի շրջանում պաշտպանական ստորաբաժանումների վճռական գործողություններով, «Վոստոկ» զորքերի խմբավորման հրետանային և ծանր հրանետային համակարգերի կրակով հետ են մղվել հակառակորդի երեք հարձակումներ ԴԺՀ-ի Մեծ Նովոսելկայի ուղղությամբ և Զապորոժիեի շրջանի Լևադնոյե բնակավայրի շրջանում։ Հակառակորդի կորուստները կազմել են ավելի քան 120 ուկրաինացի զինծառայող, երկու տանկ, ինչպես նաև երեք մարտական զրահապատ մեքենա: Տարածքային պաշտպանության 128-րդ բրիգադի, Ուկրաինայի զինված ուժերի 31-րդ մեքենայացված և 1-ին տանկային բրիգադի կենդանի ուժի և տեխնիկայի կուտակումներ են խոցվել Պրեչիստովկա, Վելիկայա Նովոսելկա և Նեսկուչնոյե բնակավայրերի շրջաններում։ Զապորոժիեի ուղղությամբ բանակային ավիացիայի հարվածներով և հրետանու կրակով խոցվել են Ուկրաինայի զինված ուժերի 65-րդ մեքենայացված բրիգադի ստորաբաժանումները Զապորոժիեի մարզի Նովոդանիլովկա բնակավայրի շրջանում: Օրվա ընթացքում տվյալ ուղղություններում ոչնչացվել է մինչև 250 ուկրաինացի զինծառայող, հինգ տանկ, յոթ մարտական զրահապատ մեքենա, երկու ավտոմեքենա, «Ակցիա» ինքնագնաց հրետանային կայանք, ինչպես նաև Դ-30 հաուբից:

• Հունիսի 13-ի գիշերը Ուկրաինայի տարածքում թիրախներին զանգվածային հարված է հասցվել թևավոր հրթիռներով և «Գերան» կամիկաձե ԱԹՍ-ներով։ Պայթյուններ են եղել Խարկովում, Դնեպրոպետրովսկում, Կիևում, Տերնոպոլում, Կրիվոյ Ռոգում և այլ քաղաքներում:

• Ռուսաստանի նախագահ Վլադիմիր Պուտինը հայտարարել է, որ եթե Ուկրաինայի կողմից ռուսական տարածքի գնդակոծությունները շարունակվեն, Մոսկվան կքննարկի Ուկրաինայում «սանիտարական գոտի» ստեղծելու հնարավորությունը՝ ՌԴ-ի անվտանգությունն ապահովելու համար։

• Պուտինը հայտարարել է, որ Ուկրաինայի պաշտպանության նախարարության հետախուզության գլխավոր վարչության կենտրոնակայանը Կիևում «փաստացի ոչնչացվել է»։ Դա պատասխան էր «կարմիր գծերի անցման» համար։

• Ուկրաինայի Խարկովի մարզում ՌԴ Բելգորոդի մարզի հետ սահմանին Ուկրաինայի զինված ուժերի ստորաբաժանումների կուտակումներ են գրանցվել:

• Ուկրաինայի գլխավոր շտաբի տեղեկատվության համաձայն՝ հունիսի 13-ի գիշերը Ուկրաինայի տարածքում գտնվող թիրախներին ՌԴ ՌՕՈւ-ն համակցված հարված է հասցրել ծովային և օդային բազավորման թևավոր հրթիռներով, ինչպես նաև «գերան» կամիկաձե ԱԹՍ-ով:

• Ուկրաինայի ԳՇ տարածած հաղորդագրության մեջ ասված է, որ հունիսի 14-ի դրությամբ, ռուսական կողմը խուճապի մեջ է: Ըստ հաղորդագրության` Ղրիմի ժամանակավորապես օկուպացված Ինքնավար Հանրապետության տարածքում «Գազպրոմ» կոչվող ընկերությունում ակտիվորեն ձևավորվում են ուկրաինական թերակղզուց ՌԴ աշխատակիցների և նրանց ընտանիքների տարհանման պլաններ: Համապատասխան ցուցակները կազմվում են: Պաշտպանության ուժերի ավիացիան մեկ օրում 13 հարված է հասցրել հակառակորդի կենտրոնացման շրջաններին, 4-ը՝ հակառակորդի զենիթահրթիռային համալիրներին: Նաև ոչնչացվել են Orlan-10 օպերատիվ-մարտավարական 2 ԱԹՍ։ Մեկ օրում հրթիռային զորքերի և հրետանու ստորաբաժանումները խոցել են կառավարման կետ, հակառակորդի անձնակազմի, սպառազինության և ռազմական տեխնիկայի կենտրոնացման 8 շրջան, զինամթերքի 3 պահեստ, զենիթահրթիռային համալիր, կրակային դիրքերում 7 հրետանային միավոր, հակաօդային պաշտպանության 2 միջոց և հակառակորդի ռադիոէլեկտրոնային պայքարի կայան: Ընդհանուր առմամբ, անցած օրվա ընթացքում ուկրաինացի զինծառայողները ոչնչացրել են 680 ռուս զինծառայող, 8 տանկ, 11 մարտական զրահապատ մեքենա, 17 հրետանային համակարգ, երկու ՀԿՌՀ, ՀՕՊ մեկ միջոց, օպերատիվ-մարտավարական 15 ԱԹՍ, 9 մեքենա և 5 միավոր հատուկ տեխնիկա:

• ՌԴ ՊՆ-ն հայտարարել է, որ ընդհանուր առմամբ, հատուկ ռազմական գործողության մեկնարկից ի վեր ոչնչացվել է 442 Ինքնաթիռ, 238 ուղղաթիռ, 4585 ԱԹՍ, 426 զենիթահրթիռային համալիրներ, 9939 տանկ և այլ մարտական զրահապատ մեքենաներ, համազարկային կրակի ռեակտիվ համակարգերի 1122 մարտական մեքենա, դաշտային հրետանու 5100 հրանոթ և ականանետ, ինչպես նաև 10927 միավոր հատուկ ռազմական ավտոմոբիլային տեխնիկա:

Ռազմական աջակցություն Ուկրաինային շահագրգիռ երկրների կողմից

• Սպիտակ տունը հայտարարել է, որ ԱՄՆ-ն բավարարել է հարձակման համար Ուկրաինայի բոլոր պահանջները, իսկ Զելենսկու գրասենյակն իր հերթին հայտարարել է. «Մենք բավարար զենք չունենք հակահարձակման համար»։ Ավելի ուշ, Ուկրաինայի արտգործնախարար Դմիտրի Կուլեբան էլ իր հերթին հայտարարել է, որ Կիևն Արևմուտքից բավականաչափ զենք է ստացել հակահարձակման համար։

• Բելգիայի վարչապետը հատուկ ծառայություններին հանձնարարել է պարզել, թե արդյոք Ուկրաինային հանձնված զենքն օգտագործվել է Բելգորոդի շրջանի վրա հարձակման ժամանակ:

• Գերմանիայի պաշտպանության նախարար Բորիս Պիստորիուսը հայտարարել է, որ Բեռլինն այս պահին չի նախատեսում Ուկրաինային փոխանցել Taurus հեռահար թևավոր հրթիռները, որոնք խնդրում է Կիևը:

• ԱՄՆ-ում Մեծ Բրիտանիայի դեսպան Կարեն Փիրսը հայտարարել է, որ Լոնդոնը միշտ խորհրդակցում է Վաշինգտոնի հետ Ուկրաինային զենք մատակարարելուց առաջ: Փիրսի խոսքով՝ ամերիկացի դաշնակիցները հանգիստ են վերաբերվել Storm Shadow թևավոր հրթիռները Կիևին հանձնելու Մեծ Բրիտանիայի որոշմանը:

• Ավստրալիան և ԱՄՆ-ը քննարկում են Ավստրալիայի ՌՕՈՒ-ի սպառազինությունից հեռացվող F/A-18 կործանիչների՝ 41 միավոր քանակով Ուկրաինա ուղարկելու հնարավորությունը:

• Ուկրաինայի նախագահ Վլադիմիր Զելենսկին հայտարարել է, որ Կիևն ակնկալում է F-16 կործանիչների «հզոր» մատակարարում: Միևնույն ժամանակ, Զելենսկին խոստովանել է, որ Ուկրաինայի տարածքում դրանց տեղակայման ենթակառուցվածքներ չկան:

• Ուկրաինան և Նիդեռլանդները դիվանագիտական ճնշում են գործադրում Իսպանիայի վրա՝ ամերիկյան Patriot ԶՀՀ մարտկոց ստանալու համար։ Համալիրն այս պահին տեղակայվել է Թուրքիայի տարածքում՝ ՆԱՏՕ-ի դաշնակիցների աջակցության ծրագրի շրջանակներում։ Այն պաշտոնապես կարող է վերադարձվել 2024 թվականից ոչ շուտ։

• Հունիսի 15-ին Բրյուսելում կկայանա Ուկրաինային զենք մատակարարող երկրների հերթական հանդիպումը։

• ԱՄՆ-ը ռազմական օգնության նոր փաթեթի շրջանակներում Ուկրաինայի համար զենիթային հրթիռներ կգնի Hawk համալիրների և մի քանի արդիականացված Patriot ԶՀՀ-ների համար՝ Կիևի մերձակայքում վնասված կամ ոչնչացված հրթիռները փոխարնելու համար:

• Բելգիան Ուկրաինային կփոխանցի 35 մլն դոլարի 105 մմ տրամաչափի հրետանային զինամթերք։

• Ամերիկացի մի խումբ կոնգրեսականներ բանաձևի նախագիծ են ներկայացրել՝ կոչ անելով ԱՄՆ նախագահ Ջո Բայդենին անհապաղ Ուկրաինային փոխանցել ATACMS օպերատիվ-մարտավարական հրթիռները:

• Ռուսաստանը Հունգարիային է փոխանցել Անդրկարպատյան 11 ուկրաինացի զինծառայողների, որոնք գերության մեջ են հայտնվել Ուկրաինայում ռազմական գործողությունների ընթացքում:

• Ամերիկյան Raytheon ընկերությունը, որը Patriot զենիթահրթիռային համալիրների արտադրողն է, ավելացնում է իր ԶՀՀ-ների թողարկումը տարեկան մինչև 12 մարտկոց և նախատեսում է այս տարի ևս հինգ Patriot մատակարարել Ուկրաինային:

• Ուկրաինական անձնակազմերը մարզվում են բրիտանական «Challenger 2» տանկերի վրա, որոնք դեռ Ուկրաինայում չեն նկատվել։

• Ուկրաինայի փոխարտգործնախարար Անդրեյ Մելնիկը հայտարարել է, որ Կիևին շտապ անհրաժեշտ են ավելի շատ արևմտյան մարտական տանկեր, ՀՄՄ և այլ զրահատեխնիկա: Հայտարարությունը հաջորդել է Ուկրաինայի զինված ուժերի մի քանի օրվա հակահարձակումից հետո, որի ընթացքում ոչնչացվել են Արևմուտքի մատակարարած զրահատեխնիկայի տասնյակ միավորներ:

• Դանիան Ուկրաինային 36 մլն դոլարի հրետանային զինամթերք կմատակարարի

• Միացյալ Նահանգները Ուկրաինային կտրամադրի մինչև 325 մլն դոլարի լրացուցիչ ռազմական օգնություն, որը կոչված է ծածկելու ամերիկյան M2A2 Bradley ՀՄՄ-ների վերջին կորուստները:

• Տարբեր մեդիատիրույթներում տեղեկություններ են շրջաառվում այն մասին, թե իբր ԱՄՆ-ը մտադիր է Ուկրաինային հանձնել ոչնչացված ուրանով տանկային արկեր։ Առաքումը հաստատված է:

• Միացյալ Նահանգները ռազմական օգնության նոր փաթեթի շրջանակներում Ուկրաինային է փոխանցում իր պահուստներից զրահատեխնիկա (15 Bradley ՀՄՄ և 10 Stryker զրահամեքենա), որպեսզի լրացնի հակահարձակման ընթացքում ոչնչացված ՀՄՄ-ները։ Մատակարարվելու են նաև ՀՕՊ-ի և HIMARS-ի համար նախատեսված զինամթերք։ Բրիտանական ռազմական օգնության նոր փաթեթի շրջանակներում Ուկրաինան կստանա հրետանային արկեր, այլ զինամթերք և ՌԼԿ։

Բանակցային գործընթաց

• Ուկրաինայի պաշտպանության նախարար Ալեքսեյ Ռեզնիկովը Զապորոժիեի ռազմաճակատի ուղղությամբ հակագրոհի գոտում Ուկրաինայի զինված ուժերի մի շարք անհաջող հարձակումներից հետո հայտարարել է, որ Կիևը հնարավոր է համարում բանակցությունների և խաղաղության համաձայնագրի հնարավորությունը, եթե Ռուսաստանը փոխի հատուկ ռազմական գործողության ավելի վաղ հայտարարված նպատակները:

• ՌԴ նախագահ Վլադիմիր Պուտինը նշել է, որ հարցի խաղաղ կարգավորման բանալին ոչ թե Մոսկվայում է, այլ՝ Արևմուտքում։ «Եթե նրանք իրոք ցանկանում են, որ այսօրվա հակամարտությունն ավարտվի բանակցությունների միջոցով, ապա ընդամենը մեկ որոշման կայացումը բավարար կլինի՝ դադարեցնել սպառազինության և ռազմական տեխնիկայի մատակարարումը։ Ուկրաինան ինքը ոչինչ չի արտադրում և հաջորդ օրն իսկ կցանկանա բանակցություններ վարել՝ արդեն ոչ թե ձևական, այլ՝ ըստ էության», – հայտարարել է Ռուսաստանի նախագահը։

• Ուկրաինայի պաշտպանության նախարարության ղեկավար Ալեքսեյ Ռեզնիկովը հայտարարել է. «Չինաստանի և այլ պետությունների գործողություններում, որոնք առաջարկում են իրենց խաղաղ ծրագրերը, «կա մեկ նրբություն. այդ երկրները ցանկանում են հանդես գալ որպես «միջնորդ Ռուսաստանի կողմից»։ Նման պետությունները չունեն «իսկական անկախ մեդիատորիա», ուստի Կիևը սպասողական դիրք է գրավում և շարունակում է հասնել հաղթանակի հակամարտությունում»։

Արտաքին քաղաքական իրադրություն

• Սպիտակ տունը հայտարարել է, որ Միացյալ Նահանգները ուշադիր հետևում է Կախովսկի ՀԷԿ-ի շուրջ ստեղծված իրավիճակին և չի կարող հաստատել Ռուսաստանի ներգրավվածությունը տեղի ունեցածին: ԱՄՆ-ն նաև կարծում է, որ Կախովսկի ՀԷԿ-ի ոչնչացումը կարող է կործանարար հետևանքներ ունենալ Ուկրաինայի էներգահամակարգի համար:

• Շվեյցարիայի խորհրդարանը հավանություն է տվել զենքի վաճառքն արգելող օրենքում կատարված բացառիկ փոփոխությանը՝ թույլ տալով երկրում արտադրված սպառազինությունների վերաարտահանումն Ուկրաինա:

• Բելառուսի պաշտպանության նախարարությունը հատուկ նշանակության ստորաբաժանումներ է տեղակայել Ուկրաինայի հետ սահմանին։

• Ռումինիան Նորվեգիայից 32 միավոր F-16 մարտական կործանիչ է գնել սպառազինությունից հանված ՄիԳ-21-երի պարկը փոխարինելու համար։ Իսկ Նորվեգիան, իր հերթին, վերազինվում է հինգերորդ սերնդի F-35A Lightning կործանիչներով:

• Լեհաստանի ցամաքային զորքերի նախկին հրամանատար, գեներալ Վալդեմար Սկշիպչակը հայտարարել է, որ Ուկրաինան ՆԱՏՕ-ի գագաթնաժողովի նախաշեմին (տեղի կունենա հուլիսին) պետք է ցույց տա, որ արժանի է վստահության՝ նկատի ունենալով ռազմաճակատի առաջխաղացումը՝ առանց հաշվի առնելու տեխնիկայի և մարդկանց կորուստները: Սպայի խոսքով՝ դրանից հետո հնարավոր կլինի Կիևին փոխանցել F-16 կործանիչներ։ Դա կարող է տեղի ունենալ առաջիկա 2-3 ամիսների ընթացքում։

• Չինաստանի առաջնորդ Սի Ցզինպինը հավանություն է տվել Ուկրաինայում իրավիճակի կարգավորմանն ուղղված աֆրիկյան առաջնորդների խաղաղ նախաձեռնությանը:

• ՆԱՏՕ-ն որոշել է «բարձրացնել» Կիևի հետ դաշինքին անդամակցելու բանակցությունների կարգավիճակը։ ՆԱՏՕ-Ուկրաինա հանձնաժողովը բարձրացվել է խորհրդի մակարդակի։ Միևնույն ժամանակ, ֆունկցիոնալությունն ու հնարավորությունները մնում են խոսակցությունների մակարդակում:

• «Ռամշտայնի» ձևաչափով Ուկրաինայի դաշնակից երկրների հաջորդ գագաթնաժողովը տեղի կունենա հունիսի 15-ին, որի հիմնական թեման կլինի այսպես կոչված, «ինքնաթիռային կոալիցիան»։

• ԱՄՆ պետքարտուղար Էնթոնի Բլինքենը հայտարարել է, որ ուկրաինական հակահարձակման հաջողությունը երկու բան կանի՝ ստիպել Մոսկվային գնալ բանակցությունների և «կամրապնդի ԱՄՆ դիրքը ցանկացած բանակցային սեղանի շուրջ»:

Ներքին զարգացումներ Ուկրաինայում, Դոնեցկում և Լուգանսկում

• Առնվազն 6200 ուկրաինացի տղամարդ անօրինական կերպով հատել է Ռումինիայի հետ սահմանը համընդհանուր մոբիլիզացիայի մեկնարկից հետո: Եվս 20.000-ը Ռումինիայում օրինական են գտնվում և չեն պատրաստվում վերադառնալ Ուկրաինա։ Ուկրաինացի սահմանապահները զգալիորեն ուժեղացրել են տրանսպորտային միջոցների զննումը ռումինական ուղղությամբ։

• Մոլդովան և Ուկրաինան երկկողմ համաձայնագիր են ստորագրել Դնեստրի վրա կամուրջ կառուցելու վերաբերյալ: Կամուրջը Կիևի ու Քիշնևի միջև տրանսպորտային միջանցքի առանցքային օղակը կդառնա, իսկ ուկրաինացի արտահանողները Ուկրաինայի կենտրոնական շրջաններից կարճ ճանապարհ կունենան դեպի Կենտրոնական և Հարավարևելյան Եվրոպայի երկրներ:

Միջազգային մեդիայի անդրադարձ

• «Berliner Zeitung» Գերմանիան մինչև հուլիսի վերջ Ուկրաինային կփոխանցի ևս 20 Marder ՀՄՄ։

• Իսրայելական մամուլը գրում է, թե Սերբիան Եվրոպայի ճնշման տակ համաձայնվել է զենք-զինամթերք մատակարարել Ուկրաինային։ Իսկ «Financial Times» ամերիյան պարբերականը թեմայի առնչությամբ գրելէ, թե սերբական զենքի մատակարարումն Ուկրաինային օգնեց Բելգրադին՝ Եվրոպան իր կողմը «գրավել» Կոսովոյի հակամարտությունում։

• «The New York Times» ամերիկյան պարբերականը՝ վկայակոչելով ՆԱՏՕ-ի ներկայացուցիչներին՝ ևս մեկ անգամ հաստատելով Ուկրաինան որպես փորձադաշտ արևմտյան սպառազինությունների համար օգտագործելու փաստը, գրել է, որ Ուկրաինական հակահարձակման արդյունքները ՆԱՏՕ-ն հաշվի կառնի արևմտյան օրինակով Ուկրաինայի զինված ուժերի հետագա վերափոխման և Ուկրաինական իրողությունների պայմաններում դաշինքի զորքերի կիրառման մարտավարության համատեքստում:

• «Washington Post»-ը բացեիբաց գրում է, որ ՆԱՏՕ-ի կողմից պատրաստված և համալրված Ուկրաինայի զինված ուժերի բրիգադները հսկայական կորուստներ են կրում հակահարձակման ժամանակ, կոնկրետ օրինակներով՝ «Ուկրաինայի 37-րդ բրիգադի զինծառայողները ժամանակակից պատրաստություն են անցել ՆԱՏՕ-ի չափանիշներով և զինված են եղել արևմուտքից մատակարարված սպառազինությամբ, սակայն հարձակումից արդեն 20 րոպե անց մեծ կորուստներ են կրել: Զորամասի 5 միավոր զրահատեխնիկա ոչնչացվել է առաջին ժամում։ «Գումարտակի կորուստները կանխագուշակում են սարսափելի ծանր գին, որը ուկրաինացի առաջնորդները պատրաստ են վճարել, և կարծում են, որ պետք է վճարեն»։