ՌԴ արտգործնախարար Սերգեյ Լավրովն առաջիկայում կայցելի Երևան, որի շրջանակներում նախատեսվում է ստորագրել մի փաստաթուղթ, որը կերաշխավորի ՌԴ մասնագետների, այդ թվում զինվորականների մուտքը ԱՄՆ-ի ֆինասնավորմամբ Հայաստանում ստեղծված կենսաբանական լաբորատորիա: Այս մասին, ըստ «Փաստինֆոյի»՝ հաղորդում է «Կոմերսանտ»-ը։
Պարբերականը նշում է, որ Ռուսաստանը բազմիցս քննադատել է Միացյալ Նահանգներին՝ Ռուսաստանի սահմաններում «ռազմական կենսաբժշկական գործունեության» համար և խոստացել է ապահովել, որ հարևան երկրներում գործող լաբորատորիաների գործունեությունն իր համար դառնա բաց:
Ռուսական և հայկական կողմերի բանակցային գործընթացին ծանոթ «Կոմերսանտ»-ի աղբյուրները պատմել են հուշագրի վրա աշխատանքի ավարտի մասին, որը երաշխավորում է ռուս մասնագետների մուտքը ՀՀ կենսաբանական լաբորատորիաներ:
Պարբերականը հաղորդում է,որ փաստաթուղթը նախատեսվում է ստորագրել նոյեմբերի 10-11-ին՝ Լավրովի Երևան այցի ընթացքում:
Մեկ այլ աղբյուր հաստատել է, որ փաստաթղթի տեքստը պատրաստ է և անցնում է միջգերատեսչական համաձայնեցում:
Նշվում է, որ ԱՄՆ փողերով արդիականացված լաբորատորիաները, որոնք իրականացնում են կենսաբանական հետազոտություններ, ուսումնասիրում են վիրուսներն ու շտամները, գործում են Ուկրաինայում, Վրաստանում, Հայաստանում և Ղազախստանում:
