Փետրվարի 27-ին լրանում է Սահմանադրական դատարանի դատավորների վաղ կենսաթոշակային համակարգին անցնելու վերջնաժամկետը, ըստ որի՝ երկամսյա ժամկետում 7 դատավորները, այդ թվում՝ ՍԴ նախագահ Հրայր Թովմասյանը, եթե մինչ այս օրը հրաժարական տային, ապա մինչև իրենց պաշտոնավարման ժամկետի լրանալը կստանային իրենց աշխատավարձի չափով կենսաթոշակ:
Հիշեցնեմ, որ ավելի վաղ Ազգային ժողովը 75 կողմ և 34 դեմ ձայներով երկրորդ ընթերցմամբ և ամբողջությամբ ընդունել էր Սահմանադրական դատարանի դատավորների վաղ կենսաթոշակային համակարգի ներդրման օրինագիծը: Այն հաստատվել էր նաեւ Հայաստանի նախագահի կողմից։ Արդարադատության նախարար Ռուստամ Բադասյանը նախագծի մասին Ազգային ժողովում իր ելույթում հայտարարել էր, որ սա հնարավորություն է տալիս ՍԴ դատավորներին «պատվով հեռանալ, սեղմել պետության կողմից իրենց մեկնված ձեռքը և չխոչընդոտել 2015-ի փոփոխություններով նախատեսված Սահմնադրական դատարանի նոր մոդելի ձևավորմանը»։