Երեկ վերջապես տեղաց առաջին լուրջ ձյունը, որին հաջորդեց ձնաբուքը, որը պրակտիկապես կաթվածահար էր արել մայրաքաղաքի երթեւեկությունը: Մասնավորապես գիշերվա ժամը 1-3-ն ընկած ժամանակահատվածում լրագրողներս փորձում էինք քաղաքում գտնել ձյունը մաքրող գոնե մեկ տեխնիկա, բայց ապարդյուն: Անգամ քաղաքապետարանի մոտ որեւէ մաքրող տեխնիկայի նշույլ չկար: Իսկ փողոցները այն աստիճան էին անանցանելի, որ մեքենաների երթեւեկությունը գրեթե անկառավարելի էր դարձել:
Փաստորեն առաջին լուրջ ձյունը ցույց տվեց, որ ծաղրածու քաղաքապետը բնավ էլ ծիծաղելի չէր, հակառակը՝ տխուր է եւ անգույն: Բայց, հավանաբար իր անգործությունը նա կպատճառաբանի հետեւյալ կերպ. դե՛ տեխնիկա չենք հանել, որ համ վառելիք խնայենք, համ էլ աղ: Իսկ խնայված գումարները, հետագայում, ամենայն հավանականությամբ, կուղղվեն քաղաքապետի եւ իր մտերմիների պարգեւավճարներին: