Ձեռնարկված անհետաձգելի գործողությունների արդյունքում բացահայտվել է 16-ամյա աղջկա սպանության դեպքը, այս մասին տեղեկացնում է Քննչական կոմիտեի մամուլ քարտուղար Նաիրա Հարությունյանը:
Նա նաև տեղեկացրել է, որ սպանությունը կատարելու կասկածանքով ձերբակալվել է 1993 թվականին ծնված երիտասարդ: Վերջինս տվել է ինքնախոստովանական ցուցմունք:
Նախաքննությունը շարունակվում է:
Ըստ Shamshyan.com–ի՝ ձերբակալվածը Գյումրի քաղաքում հաշվառված 27-ամյա Ռաֆայել Սուքիասյանն է, ով ծառայում է ՀՀ պաշտպնության նախարարությունում։
Tert.am-ն ավելի վաղ տեղեկացրել էր, որ հունվարի 5-ին ՝ ժամը 23։00-ի սահմաններում, Երևանի 1-03 շտապօգնության բժիշկների հերթապահ խումբն ահազանգել է ոստիկանության Երևան քաղաքի վարչության օպերատիվ կառավարման կենտրոն և հայտնել, որ կանչով մեկնել են Սայաթ-Նովա պողոտայի 15 շենքի բնակարաններից մեկը, որտեղ ննջասենյակում հայտնաբերել են երեխայի դի։
Ոստիկաններն ու քննիչները նշված շենքի 3-րդ հարկի բնակարաններից մեկի ննջասենյակում՝ անկողնում, հայտնաբերել էին 16-ամյա Ս. Կ-ի դին։
Դատաբժշկի նախնական եզրակացության համաձայն՝ երեխան մահացել է խեղդամահ արվելու հետևանքով։