ՀՀԿ փոխնախագահ Արմեն Աշոտյանի պաշտպանը պնդում է՝ Աշոտյանի կալանքը երկարացնելու միջնորդությունը քննելիս դատավոր Գիվի Հովհաննիսյանը թույլ է տվել կոպիտ խախտումներ, ինչով պայմանավորված փաստաբանը դիմել է ԱՆ՝ Գիվի Հովհաննիսյանի նկատմամբ վարույթ հարուցելու խնդրանքով, սակայն ԱՆ-ն մերժել է։
«ՀՀ արդարադատության նախարարին ներկայացրել էի դիմում՝ ՀՀ հակակոռուպցիոն դատարանի դատավոր Գիվի Հովհաննիսյանի նկատմամբ կարգապահական վարույթ հարուցելու մասին:
Դիմումի հիմքում դրված էին այն հանգամանքները, որ Արմեն Աշոտյանին կալանքի տակ պահելու ժամկետը երկարաձգելու քննիչի միջնորդությունը քննելիս դատավորը թույլ է տվել հետևյալ երեք կոպիտ խախտումը՝ քննել է այլ դատարանին հասցեագրված միջնորդություն, չի հայտնել ինքնաբացարկ՝ հոր և եղբոր Մարտի 1-ի գործով հետապնդումների պատճառով, չէր կարող լինել անկողմնակալ նախկին իշխանության ներկայացուցչի նկատմամբ և քննել է առերևույթ սխալ մեղադրանքով գործ․ Արմեն Աշոտյանին չէր կարող մեղսագրվել նախկին քրեական օրենսգրքի 179 հոդվածը, քանի որ այն ավելի խիստ է, քան գործող քրեական օրենսգրքի դրան համապատասխանող հոդվածը:
Այսօր ստացա նախարարի մերժումը՝ ասում է, որ նկարագրվածը բավարար չէ վարույթ հարուցելու համար:
Եվս մեկ ապացույց, որ Արմեն Աշոտյանի նկատմամբ իրականացվում է բացահայտ քաղաքական հետապնդում՝ կապիտուլյանտի անմիջական ցուցումով»,- ֆեյսբուքյան իր էջում գրել է փաստաբան Տիգրան Աթանեսյանը:
