Մեկնարկել են Արտակարգ իրավիճակների նախարար Արմեն Փամբուխչյանի մարզային շրջայցերը

Այսօր՝ հունիսի 10-ին, նախարար Փամբուխչյանն աշխատանքային այցով եղել է Գեղարքունիքի մարզում. առաջին կանգառը Գեղարքունիքի ՄՓՎ հատուկ ջրափրկարարական ջոկատն էր: Այցի ընթացքում նախարարին ուղեկցել են Գեղարքունիքի մարզպետ Կարեն Սարգսյանը, ԱԻ նախարարի առաջին տեղակալ Արտյուշ Գրիգորյանը, ՓԾ տնօրեն Արմեն Գասպարյանը, Գեղարքունիքի ՄՓՎ պետ Գևորգ Գալստյանը։
2022 թվականի լողասեզոնի բացմանն ընդառաջ՝ Արմեն Փամբուխչյանը ծանոթացել է ջրափրկարարական ջոկատի տեխնիկական հագեցվածությանը, աշխատանքային պայմաններին, առկա խնդիրներին:
Գեղարքունիքի մարզպետարանում տեղի ունեցած խորհրդակցությանն նախարար Փամբուխչյանն ուրախությամբ ընդգծել է, որ նախորդ տարի լողասեզոնի ամբողջ ընթացքում որևէ դժբախտ դեպք չի արձանագրվել և հույս հայտել, որ նույն ձեռքբերումը կունենանք նաև այս տարի։
Հանդիպման ընթացքում անդրադարձ է կատարվել նաև մայիսի 6-ին Սևանա լճում անհետացած երկու ձկնորսների որոնողական աշխատանքներին:
«Որոնումների արդյունքում՝ ձկնորսներից մեկի դին հաջողվել է հայտնաբերել, սակայն երկրորդ ձկնորսի որոնումները շարունակվում են արդեն տևական ժամանակ։ Մեր աշխատանքների արդյունավետությունը միաժամանակ պայմանավորված է Գեղարքունիքի մարզպետարանի հետ շուրջօրյա համագործակցությամբ, որի համար մեր շնորհակալությունն ենք հայտնում Գեղարքունիքի մարզպետ Կարեն Սարգսյանին, մարզպետարանի աշխատակազմին, Գեղարքունիքի ՄՓՎ-ին»,- նշել է ԱԻ նախարարը։
Գեղարքունիքի մարզպետ Կարեն Սարգսյանն իր խոսքում նշել է, որ ակնկալվում է նախորդ տարվա համեմատ ունենալ զբոսաշրջիկների 50 տոկոս ավելի աճ։
«Բնական է, որ մենք պետք է ավելի ուժեղացնենք մեր փրկարակական ծառայությունները՝ դրանք հագեցնելով տեխնիկական նոր միջոցներով ու հնարավորություններով։ Օգտվելով առիթից՝ Վարդենիկ գյուղի բնակչության անունից, ուզում եմ իմ երախտագիտութունը հայտնել ԱԻ նախարարին ու փրկարարներին՝ Սևանա լճում անհետացած ձկնորսների որոնողական աշխատանքներն անընդմեջ կազմակերպելու համար։ Մեր շուրջօրյա համագործակցությունը միշտ տալիս է տեսանելի արդյունքներ»,-նշել է Կարեն Սարգսյանը։
Մարզային շրջայցի ընթացքում ԱԻ նախարար Արմեն Փամբուխչյանն այցելել է նաև Գեղարքունիքի մարզային փրկարարական վարչություն, Սևանի, Մարտունու, Վարդենիսի, Ճամբարակի հրշեջ-փրկարարական ջոկատներ:

Թողնել պատասխան

Ձեր էլ-փոստի հասցեն չի հրապարակվելու։

eleven − 6 =