Հունիսի 6-ի երեկոյան տեղի ունեցավ Խաչատրյանի անվան 18-րդ միջազգային մրցույթի բացման հանդիսավոր արարողությունը։ Հնչեցին հայ մեծ կոմպոզիտոր Արամ Խաչատրյանի ստեղծագործությունները։ Մրցույթի պաշտոնական նվագախմբի՝ Հայաստանի պետական սիմֆոնիկ նվագախմբի հետ և դիրիժոր Սերգեյ Սմբատյանի ղեկավարությամբ ելույթ ունեցավ ջութակահար Քրիստոֆ Բարատին՝ կատարելով Խաչատրյանի Ջութակի կոնցերտը։
Երեկոյի ընթացքում ներկայացվեցին նաև մրցույթի մասնակիցներն ու ժյուրիի անդամները։
Առաջիկա շաբաթը լինելու է խաչատրյանական։ Այսօր արդեն մեկնարկել է մրցույթի առաջին փուլը։ Տարբեր երկրներ ներկայացնող թավջութակահարներն իրենց կատարումներով հանդես կգան ժյուրիի առջև։ Երկրորդ և երրորդ փուլերում պարտադիր կատարման ծրագրում ներառված են նաև Արամ Խաչատրյանի ստեղծագործությունները։
Խաչատրյանի անվան 18-րդ միջազգային մրցույթի հաղթողների անունները կհայտարարվեն հունիսի 13-ին՝ փակման գալա համերգի ընթացքում։
Խաչատրյանական մրցույթն անցկացվում է «Արամ Խաչատրյան-մրցույթ» մշակութային հիմնադրամի կազմակերպմամբ և ՀՀ ԿԳՄՍ նախարարության աջակցությամբ։
«Արամ Խաչատրյան-մրցույթ» մշակութային հիմնադրամ
