Վերաքննիչ քրեական դատարանում՝ դատավոր Արսեն Նիկողոսյանի նախագահությամբ, վերսկսվեց Ռոբերտ Քոչարյանի պաշտպանների՝ նախագահի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննության հարցով դատական նիստը:
Դատական նիստին ներկա է ՀՀ երկրորդ նախագահ Ռոբերտ Քոչարյանը, ինչպես նաև՝ տուժողների իրավահաջորդները:
Պաշտպանական կողմի ներկայացուցիչ Արամ Վարդևանյանը ներկայացրեց Ռոբերտ Քոչարյանի և երաշխավոր 4 վարչապետների՝ ՀՀ նախկին վարչապետներ Վազգեն Մանուկյանի, Խոսրով Հարությունյանի, Կարեն Կարապետյանի և ԱՀ նախկին վարչապետ Անուշավան Դանիելյանի միջև եղած աշխատանքային ու անձնական հարաբերությունների պատմությունը:
Իր ու վարչապետների աշխատանքային ու անձնական հարաբերությունների մասին խոսեց նաև Ռոբերտ Քոչարյանը:
«Հարգելի դատարան, լսել եք, որ տասնամյակների հարաբերություններ են ձևավորված, և այդ հարաբերությունները պահպանվել են մինչև վերջին կալանքը: Խորը հարգանք ունեմ այդ մարդկանց նկատմամբ»,- ասաց Ռոբերտ Քոչարյանը՝ խոսելով այն մասին, թե որքանո՞վ այդ անձանց երաշխավորությունը կազդի պատշաճ վարքագիծ դրսևորելու իր պարտավորության վրա:Ինձ համար մեծագույն պատասխանատվություն է՝ լինելով ՀՀ նախագահը, թե ինչ վարքագիծ կդրսևորեմ, և ինչպիսին կլինի դրան հանրության արձագանքը: Սրան նյութական գնահատական տալ ուղղակի հնարավոր չէ: Կցանկանայի սա Ձեր ուշումների մեջ հետագայում ուղղակի հաշվի առնել: Կարծում եմ նաև՝ իմ և կողմնակիցների կողմից և մարդկանց կողմից, որոնք ինձ չեն ընդունում, կա ձևավորված կարծիք, որ բոլոր դրական և բացասական կողմերով հանդերձ՝ ես խոսքի տեր մարդ եմ և երբեք պատասխանատվությունից չեմ խուսափում… Դա իմ բրենդն է, որ ձևավորվել է իմ կենսագրության և իմ անվան շուրջ»,- ասաց ՀՀ երկրորդ նախագահը՝ հավելելով, որ սա իր համար չափազանց կարևոր բրենդ է, և որևէ բան, որ կարող է կասկածներ առաջացնել սրա նկատմամբ, ուղղակի բացառված է:Ինձ համար ուղղակի տհաճ է, որ հիմա ստիպված է դատարանում բացատրել այս հանգամանքի կարևորությունը՝ օգտագործելով ինչ-որ բառեր:
«Ես 14 տարեկան չեմ, ես 66 տարեկան եմ, և այս տարիքում մարդը չի փոխվում: Ես 1988 թվականից որևէ մեկի առիթ չեմ տվել մտածել, որ ես կարող եմ իմ խոսքի տերը չլինել»,- ասաց Ռոբերտ Քոչարյանը:
Դատավոր Նիկողոսյանը Ռոբերտ Քոչարյանից նրան հարցեր ուղղելու թույլտվություն խնդրեց՝ հորդորելով, որ, եթե անգամ հարցերը սուր վեկտոր ունենան, դրանք չընկալել՝ որպես վիրավորանք, որովհետև այդ հարցերը միտում ունեն սոսկ օգնել արդար դատաքննությանը:
Ստանալով նախագահի համաձայնությունը՝ դատավորը նրան հարցրեց, թե իր 2 պետությունների ղեկին 20-ամյա պաշտոնավարության ընթացքում կարո՞ղ էր լինել որևէ մեկը, ով չէր լսի իրեն, և ինչպե՞ս ինքը կվերաբերվեր այդ երևույթներին:
«Ես կարծում եմ, որոշակի թյուրըմբռնում կա իմ էության վերաբերյալ ընդհանրապես»,- ասաց ՀՀ երկրորդ նախագահը:
Ըստ նրա՝ իր պաշտոնավարման ընթացքում աշխատանքային քննարկումների ընթացքում եղել են մարդիկ, ովքեր իր հետ անհամաձայնություն են ունեցել ու վիճել են անգամ այս կամ այն հարցի շուրջ:
«Եվ ամենամեծ հարգանքը ես ունենում էի հենց այն պաշտոնյաների նկատմամբ, ովքեր կարող էին կարծիք ասել, չհամաձայնել»,- նշեց Ռոբերտ Քոչարյանը՝ շեշտելով, որ մարդն իր անունը, իր նկատմամբ վերաբերմունքը, քարը քարին դնելով, ամբողջ կյանքում է կառուցում: