Այսօր խոսում եք, ասում եք՝ քաղաքական ուժը բոյկոտել է, իշխանությունը չի մտածում, քաղաքական ուժն իմ գնահատմամբ ինքնաոչնչացել է: Այս մասին Խորհրդարանում ելույթի ժամանակ հայտարարեց ՀՀ վարչապետ Նիկոլ Փաշինյանը:
«Այս ամբիոնից, երբ լուրջ դեմքով ասվում և հերքվում է մի բան, որ ՀՀ բոլոր քաղքացիները գիտեն, բոլորը գիտեն առանց բացառության, այսինքն նորությո՞ւն է, որ ՀՀ-ում կան քաղաքական ուժեր, որ ընտրակաշռք են բաժանել, նորությո՞ւն է, որ ԲՀԿ-ն ընտրակաշառքով է ընտրվել, նորությո՞ւն է որևէ մեկի համար: Երբ կանգնում ես այս ամբիոնից ասում ես մի բան, որը բոլորը գիտեն, որ այդպես չէ, դա նշանակում է ինքնաոչնչացում: Նրանք այսօր այստեղ չեն, ոչ թե նրա համար, որ հետապնդվում են, այլ այստեղ չեն, որ չկան այլևս, որովհետև ժողովրդի աչքերի մեջ նայող և սուտ խոսող քաղաքական ուժերը Հայաստանում քաղաքական գործունեություն չեն ծավալելու, չի կարելի ժողովրդին ձեռ առնել»,- հայտարարեց Փաշինյանը:
Փաշինյանն ընդգծեց՝ ովքեր ճշմարտությունից դուրս են խոսում, նրանք էլ չեն կարողանալու: «Այո, այսօր տեղի է ունենում ամենամեծ բարեփոխումը Հայաստանում, քաղաքական դաշտի բարեփոխում է տեղի ունենում: Եվ նրանք, ովքեր կուլիսներից մարիոնետների նման կառավարվել են, այլևս Հայաստանի քաղաքական դաշտում տեղ չեն ունենալու»,- շեշտեց նա:
Վարչապետը նշեց, որ հաջորդ խորհրդարանական ընտրություններում, հաջորդ Խորդարանում տեղ են ունենալու միայն ու միայն այնպիսի քաղաքական ուժեր, որոնք աներկբայորեն պաշտպանում են 2018 թվականի ոչ բռնի, թավշյա, ժողովրդավարական հեղափոխության արժեքները: «Այսօր այդ ուժերից կան, որ մեզ քննադատում են: Ամենամեծ քննադատելու տեղն իրենք ունեն և ամենաշատը իրենց քննադատությունից ենք մենք նեղվում, չենք նեղանում, նեղվում ենք, որովհետև նրանք լավ են անում, որ քննադատում են, ապագան նրանցն է: Ապագա իշխանությունն էլ, ընդդիմությունն էլ այս դահլիճի հարյուր տոկոսն են, դրանից դուրս որևէ մեկը այս խորհրդարանում տեղ չի ունենալու: Սա ասում եմ ոչ թե որպես վարչապետ, այլ՝ ՀՀ քաղաքացի»,- հայտարարեց նա:
