Թուրքիայի խորհրդարանի հայազգի պատգամավոր Կարո Փայլանը թուրքական «Էվրենսել» պարբերականին տված հարցազրույցում հայտարարել է, որ 1915 թվականին տեղի ունեցած դեպքերի քննարկման և առերեսման միակ վայրը հիմնադրման 100-ամյակը նշող Թուրքիայի խորհրդարանն է:
«Այս հողի վրա տեղի է ունեցել հայերի ցեղասպանությունը: Ոչնչացվել է հայ ժողովուրդը և նրա մշակութային ժառանգությունը: Սակայն դրա հետ չեն առերեսվել 105 տարվա ընթացքում, ավելին՝ աջակցություն է ստացել ժխտողական քաղաքականությունը»,-ասել է Փայլանը:
Փայլանը հիշեցրել է, որ մինչև հիմա Թուրքիայում Հայոց ցեղասպանության գլխավոր պատասխանատուներ Թալեաթ և Էնվեր փաշաների անուններով փողոցներ կան: Նա ընդգծել է, որ նման կործանարար քաղաքականությունը և տեղի ունեցածի հետ չառերեսվելը կարող է հանգեցնել տեղի ունեցածի կրկնության:
Հայազգի պատգամավորը նշել է, որ Թուրքիայում ատելության հողի վրա նմանատիպ գործողությունները շարունակվում են քուրդ ժողովրդի դեմ:
«Էրդողանի ուղղած ցավակցությունները կարևոր են: Դրանք սկսվել են 2013 թվականից: Սակայն ցավակցություններով հանդերձ նա շարունակում է նմանատիպ մի քաղաքականություն վարել` լրագրողներին ու քաղաքական գործիչներին բանտերում պահելով»,-հայտարարել է Կարո Փայլանը:
Հայազգի պատգամավորը նշել է նաև, որ տարբեր երկրների խորհրդարանների կողմից Հայոց ցեղասպանության ճանաչումը «չի ամոքում վերքերը» և ինքը խորհրդարանի առաջիկա նիստում առաջարկելու է առերեսվել տեղի ունեցածի հետ և արդարացի բնորոշում տալ Հայոց ցեղասպանությանը:
