Պատճառաբանում են, թե ծննդկանների թիվը շատ քիչ է, տարվա մեջ ունենք 106 ծնունդ, սակայն ասում են, որ պետք է ունենայինք 150-ը: Այս մասին tert.am -ի հետ զրույցում ասաց Մարալիկի հերթապահ մանկաբարձուհիներից Հերմինե Անիսյանը:
Նրա խոսքով՝ իրենք սպասարկում են 17 գյուղից 5-6-ը, որովհետև մյուս գյուղերից չեն կարողանում գալ. «Բազմիցս դիմել ենք համապատասխան մարմիններին, այնինչ արձագանք չկա, տրանսպորտ չեն տալիս, որ մարդիկ կարողանան գան և օգտվեն Մարալիկի ծննդատնից, ուստի այդ իսկ պատճառով քչացել են ծնունդները»,- ասաց նա:
Հիշեցնենք, որ Մարալիկի բնակիչները փակել են Երևան-Գյումրի ճանապարհը և պահանջում են չփակել իրենց ծննդատունը: «Նախարարությունից պատճառաբանում են, թե մենք համապատասխան մասնագետ չունենք: Մեր վիրահատող բժիշկ-գինեկոլոգը երկու ամիս առաջ մահացել է, ավտոմատ արհեստականորեն հղիները գնացին Գյումրի, որն էլ ցույց է տալիս, որ հղիները քիչ են: Ուզում են, որ մեր մանկաբույժը 30 հազար դրամով աշխատի: Բերեք, ֆինանսավորեք, այդ ուղղությամբ ոչ մեկ չի աշխատում: Ես հասկանում եմ, որ եթե ցանկություն լինի, ամեն ինչը կարող է իր տեղում լինել, ցանկություն չկա, չեն պայքարում, վերևներում սխալ տվյալներ են ներկայացնում»,- ասաց նա:
Անիսյանը նշեց, որ Մարալիկը եղել է շրջկենտրոնի ամենամեծ հիվանդանոցը. «Վիրաբուժականը փակեցին, ինֆեկցիոնը փակեցին, հիմա հերթը ծննդատանն է: Հղիները բողոքում են, ասում, որ ի վիճակի չեն Գյումրի գնալու, ինչու եք մեզ ստիպում, որ մենք գնանք Գյումրի: Ճանապարհին կարող են նաև կորցնել երեխային, ո՞վ է պատասխան տալու»,- ասաց նա և հավելեց, որ իրենք կոչով դիմում են թե՛ նախարարին, թե՛ Փաշինյանին և խնդրում՝այս հարցին դրական լուծում տալ:
Նա ընդգծեց՝ եթե չկան մասնագետներ, ապա պետք է բերել նրանց: «Մենք տարվա մեջ 106 ծնունդ ենք տվել, իսկ Գյումրին մեծ քաղաք է, տվել է 150 ծնունդ, եթե Գյումրին տալիս է 150-ը, նորմա՞լ է, իսկ եթե այս շրջանը տալիս է 106 ծնունդ, դա նորմալ չէ՞»:
Նշենք որ ծննդատունն ունի 12 աշխատակից:
Մեկ այլ մանկաբարձ էլ նշեց, որ դեկտեմբերի 30-ին գնացել է աշխատանքի, գլխավոր բժիշկն ասել է՝ գնացեք տուն, հիվանդանոցը փակ է, աշխատանք չկա: Վերջինս ասաց նաև, որ ամսի 7-ին գիշերը երկու ծնունդ է ընդունել:
Ցուցարարներից մեկն էլ ասաց՝ եթե այդուհանդերձ փակեն ծննդատունը, իրենք չեն կարող ծննդկաններին Գյումրի տանել. «Միանգամից դագաղն էլ հետը պատվիրենք էլի»,- ասաց նա:
Մեկ այլ ցուցարար էլ հավելեց՝ երկու ամիս առաջ նախարարն ասում էր, թե Արթիկի Մարալիկի և Թալինի հիվանդանոցները պետք է վերանորոգվեն, հիմա ի՞նչ եղավ:
«Էդ նախարարը պետք է հանվի, էդ մոլախոտ է, հո նախարար չէ, պիտի էդ մոլախոտներին Փաշինյանը հանի, տենց մոլախոտներն են խանգարում Փաշինյանին»,- եզրափակեց ցուցարարը:
Մանրամասն` tert.am -ի տեսանյությում
