Շանթ Հարությունյանը դատախազությունից պահանջում է բողոքարկել իր նկատմամբ կայացված «ապօրինի վճիռը»

Մարդու իրավունքների պաշտպանի ներկայացուցիչները երեկ այցելել են «Վարդաշեն» քրեակատարողական հիմնարկում պահվող Շանթ Հարությունյանին: Ըստ գրասենյակի տարածած հաղորդագրության՝ Շանթ Հարությունյանն իր ազատ արձակման հետ կապված հարցեր է ներկայացրել։ Լուծման հնարավոր տարբերակները պաշտպանի աշխատակազմում ուսումնասիրվում են։

Մինչ այդ, 2013 թվականին «Արժեքների հեղափոխություն» նախաձեռնած և 6 տարվա ազատազրկման դատապարտված Շանթ Հարությունյանի պաշտպան Ինեսսա Պետրոսյանը հայտնում է իր պաշտպանյալի տեսակետը: Ըստ այդմ՝ Հարությունյանը համարում է, որ իրեն դատապարտելով՝ դատարանն ապօրինի որոշում է կայացրել և ակնկալում է, որ նոր իշխանության օրոք դատախազությունը պետք է բողոքարկի դատարանի վճիռը:

«Շանթ Հարությունյանը գտնում է, որ թավշյա հեղափոխությունից հետո դատախազությունը պետք է ներկայացնի բողոք, բողոքարկվի այդ անօրինական դատական ակտը, քանի որ այն կայացվել է այն ժամանակվա իշխանությունների հորդորով, և Շանթ Հարությունյանի մասով պետք է կայացվի արդարացման դատական ակտ»,- «Ազատությանն» ասաց Ինեսսա Պետրոսյանը։

2013 թվականի նոյեմբերի 5-ին «Ցեղակրոն» կուսակցության առաջնորդ Շանթ Հարությունյանն ու նրա ընկերները Երևանի Ազատության հրապարակից «անոնիմուսների երթ» էին սկսել, որը Մաշտոցի պողոտայում վերաճեց ոստիկանների հետ բախումների։ Շանթ Հարությունյանն ու նրա ընկերները ձերբակալվեցին և խուլիգանության հոդվածով դատապարտվեցին ազատազրկման։

«Նոյեմբերի 5-ի» գործով դատապարտվեց 14 մարդ։ Մինչ այժմ անազատության մեջ է միայն Շանթ Հարությունյանը: Հարությունյանի որդին, Շահեն Հարությունյանը, նշում է՝ բազմաթիվ իրավապաշտպան կազմակերպությունների գնահատմամբ՝ իր հայրը քաղբանտարկյալ է, սակայն իշխանությունը նրան ազատ արձակելու համարձակություն չունի: Ըստ Շահեն Հարությունյանի, հակառուսական կողմնորոշմամբ իր հորն արդարացնելու վճիռը կարող է խնդիրներ ստեղծել Հայաստանի իշխանությունների համար:

«Այո, Նիկոլ Փաշինյանը բարոյական շատ որակներով տարբերվում է Սերժ Սարգսյանից, այո, Նիկոլ Փաշինյանն, ի տաբերություն Սերժ Սարգսյանի, ունի բարոյական նկարագիր, այո՛, նա կցանկանար Շանթ Հարությունյանին ազատ արձակել, քանի որ, ի վերջո, նրանք միասին պայքարի որոշակի ուղի են անցել, իսկ մարտիմեկյան իրադարձությունների օրը հարթակում մնացել են Նիկոլ Փաշինյանն ու Շանթ Հարությունյանը, բոլորը գնացած են եղել։ Ինչու՞ չպետք է ցանկանար ազատ արձակել: Բայց նա պատասխանատու է ոչ միայն իր խղճի առաջ, պատասխանատու է ոչ միայն կառավարության ու ժողովրդի առաջ, այլև պատասխանատու է Ռուսաստանի առաջ»,- ասաց Շահեն Հարությունյանը։

Իրավապաշտպան Ժաննա Ալեքսանյանը համամիտ չէ Շահեն Հարությունյանի հետ: Ասում է՝ Հայաստանի նոր իշխանություններն իրենց գործելաոճով նման ենթադրությունների հիմք չեն տվել: «Մենք նաև չենք տեսել, որ իշխանությունները հպատակ են, ինչպես նախկին իշխանությունները, որոնք հպատակ էին: Իրոք, ստրկության աստիճանի հպատակ էին Ռուսաստանին, ռուսական իշխանություններին։ Չեմ կարծում, որ Նիկոլ Փաշինյանի կառավարությունը այդպիսի տրամադրություններ ունի, որ չի կարող Շանթ Հարությունյանին ազատել»,- ասում է իրավապաշտպանը։

Միաժամանակ, Ալեքսանյանը Շանթ Հարությունյանի գործը հանիրավի մոռացված է որակում: Կարծում է՝ պատճառներից մեկն էլ այն է, որ «Արժեքների հեղափոխություն» նախաձեռնած Հարությունյանն իրեն ազատ արձակելու հարցն ինչպես հարկն է չի հանրայնացրել: «Շանթ Հարությունյանը դասական քաղբանտարկյալ է և նա պետք է ազատ արձակվի։ Ես իրոք կհորդորեի իշխանություններին, կառավարությանը, Նիկոլ Փաշինյանին, որ ընդունեին՝ անուշադիր են գտնվել Շանթի նկատմամբ»,- շարունակում է Ժաննա Ալեքսանյանը։

«Ցեղակրոն» կուսակցության ղեկավարի որդու պնդմամբ՝ անազատության մեջ գտնվելով՝ Շանթ Հարությունյանը չի կարողանում իրացնել քաղաքական գործընթացներին մասնակցելու իր սահմանադրական իրավունքը: Հարությունյանի փաստաբանն ասում է՝ բողոքարկման իրավունք նաև իրենք ունեն, սակայն չեն ցանկանում օգտվել դրանից: Հարությունյանի պահանջն է, որ հենց դատախազությունը բողոքարկի «դատարանի ապօրինի վճիռը»:

Դատախազությունից որևէ պաշտոնական արձագանք հարցի վերաբերյալ չկա:

«Ալենին որտեղ տեսնեմ հեգնանքով հիշեցնելու եմ նրա ով լինելը».Սևան Աղաջանյան

06.08.2020

Մարիա Կարապետյանը և Սոս Ավետիսյանը պետք է վայր դնեն իրենց մանդատները.Գեղամ Պետրոսյան

05.08.2020

«բարսեղյան լևոնիկ,մյուս անգամ, Սերժ Սարգսյանի անունը ռեխիցդ արտաբերելուց լեզուդ անպայման կկծես ու նոր կբառաչես». Հովհաննես Խաչատրյան

08.08.2020

Հայաստանին պոկում են Մոսկվայից

06.08.2020

«Նորք» ինֆեկցիոն կլինիկական հիվանդանոցի տնօրեն Մհեր Դավիդյանցն ազատման դիմում է ներկայացրել

07.08.2020

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով