Մամուլում այսօր ակտիվորեն շրջանառվում է տեղեկությունն այն մասին, որ Երևանի Թատրոնի և կինոյի պետական ինստիտուտի առաջին հարկում ազարտային խաղերին վարձով տարածքներ են տրամադրում։
Թեմայի հետ կապված Aysor.am-ը մեկնաբանություն էր խնդրել ինստիտուտի հանրային կապերի և տեղեկատվության պատասխանատու Էրիկ Բարսեղյանից, ով հերքել էր լուրը՝ նշելով, որ «այդ տարածքները «Երևանի Թատրոնի և կինոյի պետական ինստիտուտ» ՊՈԱԿ-ի հետ ոչ մի կապ չունեն»։
Ավելի ուշ պաշտոնական պարզաբանում է ներկայացրել Երևանի Թատրոնի և կինոյի պետական ինստիտուտը, որում, մասնավորապես, ասված է.
«Երևանի թատրոնի և կինոյի պետական ինստիտուտը իր տարակուսանքն ու վրդովմունքն է հայտնում boomnews.am կայքում ս.թ. սեպտեմբերի 23-ին տեղադրված «Ահազանգ. Երևանի թատրոնի և կինոյի պետական ինստիտուտում ազարտային խաղերին վարձով տարածքներ են տրամադրվել» վերնագրով նյութի վերաբերյալ, որտեղ առկա են չստուգված և իրականությանը չհամապատասխանող տեղեկություններ՝ ինստիտուտի շենքում վարձակալությամբ իբրև թե ազարտային խաղերի տարածքների, ինչպես նաև ուսանողների՝ «փորձ անելու տեղ» չունենալու մասին, այն դեպքում, երբ ինստիտուտի բոլոր չորս հարկերում գոյություն ունեն համապատասխան լսարաններ և ուսանողական թատրոն՝ բեմական տարածքով։
Ինչ վերաբերում է շենքի նկուղային հարկում գործող լոտոյի և տոտոյի գրասենյակներին՝ ապա հայտնում ենք, որ նշված տարածքը հանդիսանում է այդ գրասենյակների սեփականությունը և ինստիտուտին չի պատկանում դեռ 2006 թ-ից»։
