Ադրբեջանի հետ խաղաղության պայմանագիրը միշտ եղել է վերջնանպատակ բոլորիս համար, այդ խաղաղության պայմանագրով պետք է ի վերջո վերջնականապես կարգավորվի ադրբեջանա-ղարաբաղյան հակամարտությունը։ Այլ հարց է, որ Ադրբեջանն այլ պատկերացում ունի, ուզում է, որ մենք լքենք Արցախը։ Սա է իրենց նպատակը, դա չեն թաքցնում։ Այս մասին լրագրողների հետ զրույցում ասաց Արցախի ԱԳՆ նախարար Դավիթ Բաբայանը։
«Պետք է աշխատել՝ այդ խաղաղության պայմանագիրը կյանքի կոչելու, բայց ոչ Ադրբեջանի տեսակետից»,- նշեց Բաբայանը։
Նրա խոսքով՝ հակամարտությունը կարող է կարգավորվել, եթե միայն համապարփակ ձևով հաշտեցում լինի հասարակությունների միջև, ադրբեջանական հասարակությունը, դժբախտաբար, պատրաստ չէ։
«Այստեղ խնդիրը ժողովրդի մեջ չէ։ Չի լինում լավ կամ վատ ժողովուրդներ, լինում են՝ լավ և վատ պետություններ։ Ի դեմս Ադրբեջանի՝ ունենք մի երկիր, որտեղ նացիզմը պետական քաղաքականություն է»,- ընդգծեց Բաբայանը։
Ինչ վերաբերում է Արցախի կարգավիճակին, Բաբայանն ընդգծեց՝ Արցախը երբևիցե չի լինելու Ադրբեջանի կազմում։
«Սա անընդունելի է։ Ի՞նչ պետք է անի աշխարհը։ Եթե ամբողջ աշխարհն ասի՝ միացեք Ադրբեջանին, եթե չենք միանալու, ինչ պետք է անեն, կոտորելու՞ են մեզ, իհարկե՝ ոչ»,- նշեց Բաբայանը։