Արցախի նախագահ Արայիկ Հարությունյանը ասուլիսին անդրադառնալով ՀՀ իշխանությունների հետ համագործակցությանն Արցախում ընթացող մարտական գործողությունների շրջանակում, ասաց, որ միասին են իրականացնում կառավարման, մարտական ամբողջ գործընթացը:
«ՀՀ վարչապետի հետ կապի մեջ ենք ոչ թե 1-2 անգամ, այլ եթե կապ է լինում, ժամը մեկ առնվազն: ՀՀ իշխանությունները տեղեկացված են ամբողջ պրոցեսին` սկսած առաջնագծից մինչև ժողովրդի առօրյա, պրոբլեմներ, և չկա մի խնդիր, որ վայրկյանների ընթացում լուծում չստանա: Եվ այս համախմբվածությունը, որը կա, պետք է շարունակել, դա է լինելու մեր հաղթանակի գրավականը»,-նշեց ԱՀ ղեկավարը:
Խոսելով հրադադարից, Արայիկ Հարությունյանն ասաց, որ եթե Թուրքիան և Ադրբեջանը չհարգեն Ռուսաստանի միջնորդությունը, միջազգային կառույցների հայտարարությունները և չգնան կրակի դադարեցման, առաջին հերթին հումանիտար խնդիրների համար, և հետո արդեն բանակցությունների, ապա դա ապացույց է, որ այս տարածաշրջանում ոչ թե ղարաբաղա-ադրբեջանական պայքար է, այլ թաքնված է շատ ավելի ծանր, մարդկությանը վտանգ սպառնացող խնդիրներ կամ ծրագրեր:
«Եթե առաջիկա 1-2 օրվա ընթացքում մենք չզգանք Ադրբեջանի պատրաստակամությունը խաղաղ ճանապարհով հարցի լուծման, դիմելու եմ առաջին հերթին Հայաստանի իշխանություններին ճանաչելու Արցախի անկախությունը, ինչպես նաև միջազգային կառույցներին ու աշխարհի բոլոր երկրներին: Այստեղ մենք կտեսնենք այն երկրների ցանկը, որոնք հարգում են մարդու իրավունքների, միջազգային իրավունքները, ազգերի ինքնորոշման իրավունքները: Աշխարհը կտեսնի այն երկրների ցանկը, որոնք աջակցում են տեռորիզմին»,- շեշտեց Արցախի նախագահը։
Հարությունյանի խոսքով՝ այն պետությունները, որոնք աջակցում են Ադրբեջանին, աջակցում են միջազգային տեռորիզմին, այդ երկրները պետք է ցուցակագրել, և այդ երկրների ժողովուրդներն էլ պետք է գիտակցեն իրենց իշխանությունների վարքագիծը, որոնք պետք է պատասխան տան մարդկության ու Աստծո առաջ։
