Առողջապահության համաշխարհային կազմակերպությունը «իմունային անձնագրերի» թողարկմանը դեմ է հանդես գալիս՝ նշելով, որ որևէ ապացույց չկա, որ կորոնավիրուսի հակամարմինները կայուն իմունային համակարգ են ապահովում հետագայում չվարակվելու համար, հայտնում է «Ռիա Նովոստի» գործակալությունը՝ հղում տալով կազմակերպության էջում հրապարակված հատարարությանը։
«Որոշ կառավարություններ ենթադրություններ են արել, թե COVID-19 առաջացնող SARS-CoV-2 վիրուսի հակամարմինների հայտնաբերումը կարող է «իմունային անձնագրերի» կամ «ռիսկի բացակայության մասին վկայականի» ստեղծման հիմք դառնալ, որոնց միջոցով մարդիկ կկարողանան ճանապարհորդել կամ աշխատանքի վերադառնալ և կրկնակի վարակումից պաշտպանված լինել։ Ներկայումս որևէ ապացույց չկա, որ COVID-19-ով հիվանդացած և հակամարմիններ ունեցող մարդիկ պաշտպանված են կրկնակի վարակումից»,- ասվում է հայտարարությունում։
ԱՀԿ-ից հիշեցրել են նաև, որ բնական վարակի միջոցով պաթոգենի նկատմամբ դիմադրողականության զարգազումը բազմաստիճան գործընթաց է, որը հիմնականում տեղի է ունենում 1-2 շաբաթվա ընթացքում։ Հետազոտությունների համաձայն՝ վարակից վերականգնված հիվանդների մոտ նոր վիրուսից պաշտպանիչ հակամարմիններ առաջանում են, սակայն ապրիլի 24-ի դրությամբ որևէ ուսումնասիրություն չի կատարվել, որը կապացուցի, որ SARS-CoV-2 վիրուսի հակամարմինները COVID-19-ից պաշտպանություն են ապահովում։
Բացի այդ COVID-19-ի հակամարմինների հայտնաբերման լաբորատոր թեստերը դրանց ճշգրտության և վստահելիության հետագա ստուգումների կարիք ունեն։
Ոչ ճշգրիտ իմունաախտորոշիչ թեստերը կարող են սխալ կերպով մարդկանց երկու մասի դասակարգել․ առաջինը՝ կարող են վարակակրի մոտ ցույց չտալ վիրուսի առկայությունը կամ իրականում չվարակված անձին վարակված ցույց տալ։
ԱՀԿ-ն ընդգծում է, որ երկու տեսակի սխալն էլ կարող է կորոնավիրուսի դեմ պայքարում լուրջ հետևանքներ ունենալ:
