7or.am-ը գրում է. «Բուլգակովն իր «Վարպետը և Մարգարիտան» վեպում մի ուշագրավ ձևակերպում ունի. «Ձեռագրերը չեն այրվում»,- ասում էր մեծ գրողը: Վերաձևակերպելով նրա ասածները՝ կարող ենք նշել, որ ֆեյսբուքյան գրառումները չեն անհետանում:
Այդ գրառումներից մեկում նշված էր հետևյալը. «Չեն կարող Քոչարյանին պաշտպանող ալիքները կամ կայքերն անաչառ լուսաբանեն իրեն ազատազրկած քաղաքական թիմին»:
Գրառման հեղինակը «Իմ քայլը» դաշինքի գաղափարական թևի ներկայացուցիչ, ԱԺ պատգամավոր և այլևս հայտնի քաղաքական գործիչ Լուսինե Բադալյանն է՝ Լուլուն:
Ճիշտ է, հետո նա բազմաթիվ անգամներ խմբագրել էր այդ գրառումը, բայց ոմանք դաժանաբար «սքրին շոթ» էին արել գրառման նախնական տարբերակը, այսինքն՝ պահել էին նրա մտքերի կուսական տեսքը:
Ըստ ամենայնի՝ Լուսինեի գրառումը արտաքին միջամտության արդյունքում էր վերափոխվել, սակայն եղածն արդեն արձանագրվել էր, ու անհարմար ստացվեց:
Բադալյանն իր գրառմամբ անկեղծացել էր ու Թումանյանի հայտնի ստեղծագործության հերոս Գիքորի պես տան խոսակցությունը (ի դեպ, «Իմ քայլում» Գիքորների պակաս չկա՝ վերից վար) և ներքին տրամադրությունն արտացոլել ֆեյսբուքյան իր էջում՝ ակամայից խոստովանելով, որ ՀՀ 2–րդ նախագահ Ռոբերտ Քոչարյանին ազատազրկել է իրենց քաղաքական թիմը (դե՛, Նիկոլ Փաշինյանը, էլի՛):
Ինչպես ասում են՝ մանկան շուրթերով բարբառում է ճշմարտությունը: Լուլուն պարզապես ևս մեկ անգամ հաստատել է, որ Քոչարյանի դեմ գործ է հարուցվել, ու նա կալանավորվել է քաղաքական ղեկավարության որոշմամբ: ՀՔԾ-ն ու դրա տխրահռչակ ղեկավար Սասուն Խաչատրյանը պարզապես գործիքի դեր են կատարում քաղաքական ղեկավարության ձեռքում:
Այն, որ Քոչարյանը քաղաքական հետապնդման է ենթարկվում, ապացուցվեց դեռևս ամիսներ առաջ, երբ հանրության սեփականությունը դարձավ հայտնի գաղտնալսումը: Լուլուն ընդամենն ամրապնդել է այդ ապացույցը: Դրա համար էլ նրա գրառումը սուսլովաբար խմբագրել էին տվել, բայց դա բան չփոխեց: Լուլուն «քաշեց» թիմին, բայց հանուն արդարության պետք է նշել, որ այդ թիմում բոլորն են Լուլուներ, և չարժե միայն այդ աղջկան մեղադրել:
