«Հրապարակ» օրաթերթը գրում է․ Տարօրինակ «զուգադիպությամբ»՝ ադրբեջանցիները գերի են տանում այն գործիչներին, որոնք Նիկոլ Փաշինյանի ընդդիմախոսներն էին։ Տպավորություն է, որ Ադրբեջանն այս հարցն էլ է նրա հետ համաձայնեցնում։ Ռուբեն Վարդանյանն իշխանության պոտենցիալ ժառանգորդներից է, ՊԲ նախկին հրամանատար Լեւոն Մնացականյանը՝ Ռիժի Լյովը, Սերժ Սարգսյանի մտերիմներից, ՊԲ հրամանատարի նախկին տեղակալ Դավիթ Մանուկյանը՝ պատգամավոր Գեղամ Մանուկյանի եղբայրը։ Իսկ նախկին պետնախարար Գուրգեն Ներսիսյանին ադրբեջանցիները տարել են, կես ժամ պահել ու բաց թողել։ Ըստ ամենայնի, ճշտվել են Երեւանի հետ։
Երեկ լուրեր տարածվեցին, թե ԱՀ նախագահ Սամվել Շահրամանյանը հանդիպել է ադրբեջանցիների հետ՝ երկրի ռազմաքաղաքական ղեկավարության անվտանգ դուրսբերումը քննարկելու։ Թե ինչ արդյունք են տվել բանակցությունները, հայտնի չէ։ Դեռեւս Արցախում են նախկին նախագահներ Արկադի Ղուկասյանը, Բակո Սահակյանն ու Արայիկ Հարությունյանը։
Հոդվածն ամբողջությամբ կարող եք կարդալ «Հրապարակ» թերթի՝ 30. 09․ 23 թ համարում։
