ՀՀ ԱԺ «Հայաստան» խմբակցությունը միանում է Արցախի խորհրդարանում ընդունված հայտարարությանը: Այս մասին լրագրողներին տեղեկացրել է «Հայաստան» խմբակցության պատգամավոր Անդրանիկ Թեւանյանն ապրիլի 15-ի խորհրդարանական ճեպազրույցների ժամանակ: Պատգամավորն ընդգծել է, որ Արցախի Ազգային ժողովն ու Հայաստանի խորհրդարանական ընդդիմությունը դեմ են այն մոտեցմանը, որն առաջարկում է Հայաստանի իշխանությունը:
«ՀՀ գործող իշխանությունն ասել էր, որ խնդրի լուծումը պետք է բավարարի Արցախի ժողովրդին, սակայն Արցախի ժողովուրդը դեմ է այդպիսի լուծմանը եւ Հայաստանի իշխանություններին համարում է ոչ լեգիտիմ»,- նշել է պատգամավորը:
Անդրադառնալով ԼՂ կարգավիճակի հարցում հայկական կողմի նշաձողն իջեցնելու վերաբերյալ վարչապետի հայտարարությանը՝ Անդրանիկ Թեւանյանն ասել է, որ ԵԱՀԿ Մինսկի խմբի համանախագահող երկրների որեւէ ներկայացուցիչ չի հայտարարել այն մասին, որ Հայաստանը պետք է իջեցնի նշաձողը կարգավիճակի հետ կապված:
Պատասխանելով լրագրողի այն հարցին, որ ընդդիմությունը հստակ քայլեր չի ձեռնարկում, բացի տարբեր վայրերում դրոշներ տեղադրելուց՝ Անդրանիկ Թեւանյանն ընդգծել է, որ ընդդիմությունն այժմ պետք է կազմակերպվի՝ հաշվի առնելով փողոցային պայքարի ընթացքում նախկինում թույլ տված սխալները: Նա նշել է, որ ընդդիմադիրներն իրենց մանդատն ու կարգավիճակը ոչ թե որպես իրավունք ու հնարավորություն են դիտարկում, այլ որպես պատասխանատվություն:
«Այո, մենք ունենք արդյունավետ գործելու խնդիր: Դրոշը տեղադրելը զուտ խորհրդանշական նշանակություն ուներ, եւ փորձը ցույց տվեց, որ ճիշտ ենք արել: Պետք է այնպես անենք, որ արդյունք ունենանք, զուտ հանրահավաքով չլինի եւ ակտիվացնենք փողոցային պայքարը: Իշխանափոխությունը պետք է անել մաքսիմալ այնպես, որ Հայաստանն ու Արցախը չվնասվեն»,-նշել է ընդդիմադիր պատգամավորը:
