Ազատագրական շարժման մասնակիցները համահավաք էին կազմակերպել Հանրապետության հրապարակում։ Նրանք պահանջում են Նիկոլ Փաշինյանից ներկայացնել ստորագրվելիք փաստաթղթի բովանդակությունը։
Շարժման անդամներից Արա Զոհրաբյանը հայտարարեց, որ երթ են անցկացնելու։ Բողոքի ակցիայի մասնակիցները անցնելու են Ամիրյան փողոցով, Մաշտոցի պողոտայով, Սայաթ-Նովայով, Աբովյան փողոցով ապա վերադառնալու են կրկին Հանրապետության հրապարակ։ Նրանք ժամանակ են տվել Նիկոլ Փաշինյանին, ներկայանալու հրապարակ, պատասխանել իրենց հարցերին։ Զոհրաբյանը վստահ է՝ Փաշինյանը չի ներկայանա և դա կհամարեն արհամարանք իրենց նկատմամբ, ապա վաղվանից իրենք նույն կերպ կպատասխանեն։
«Մենք էլ լրիվ իրավունք կունենանք վաղվանից մեր արհամարանքը ցույց տալու իրենց։ 2018-ին ռադիոտուն ու բուհեր էին մտնում, ինչ է՝ իրենք արտոնյալ են՝ մենք ո՞չ, այդ գործիքները միայն իրենց համա՞ր են։ Մենք էլ ենք օրինակ վերցնում իրենից։ Մենք ողջամտությունը չենք կորցնելու։ Պետք է այնպես անենք, որ այս ամենը խաղաղ հանգուցալուծում ունենա, դրա ճանապարհը մարդկանց քանակն ավելացնելն է»։
Նշենք, որ շարժումը ավելի վաղ հայտնել էր, որ Նիկոլ Փաշինյանը հայտարարել է, որ իր սեղանին դրված է Հայաստանի Հանրապետության և Ադրբեջանի միջև սահմանագծման ու սահմանազատման վերաբերյալ փաստաթուղթ, որի բովանդակությունը գաղտնի է պահվում: Փաստաթղթի վերաբերյալ ունեն հիմնավոր կասկածներ, որ Հայաստանի Հանրապետությունից թշնամուն զիջվելու են կենսական տարածքներ, ռազմավարական կապուղիներ ու բարձունքներ, իսկ Արցախը ճանաչվելու է Ադրբեջանի մաս:
Պահանջում են Նիկոլ Փաշինյանից՝ ներկայացնել իր նշած փաստաթղթի բովանդակությունը: Պահանջում են ՀՀ Ազգային Ժողովից և ՀՀ նախագահից իրենց իրավասությունների սահմաններում բարձրացնել այս հարցը: