ԿՈՉ.Դատապարտված են այն ազգերը, որոնց էլիտաները զուրկ են ազգային արժանապատվությունից

 

 

Սիրելի քույրեր և եղբայրներ,

 

Ապրիլի 24-ի հանգույն մեր ազգային սև օրերից է ռուս- թուրքական մոսկովյան դավադիր պայմանագրի վերակնքման՝ Կարսի պայմանագրի այս օրը, որով Հայաստանից անջատեցին Կարսի մարզը, Սուրմալուի գավառը և ամբողջ Նախիջևանը: Միջազգային օրենքներով ապօրինի, իսկ ազգային տեսանկյունից՝ հակահայ այդ պայմանագրի տակ ռուսների և թուրքերի ստիպմամբ դրված է նաև Խորհրդային Հայաստանի մյասնիկյանական կառավարության ստորագրությունը: Մեր ապաշնորհության պատճառով Պատմությունը մոտենում է իր կրկնությանը: Պետք է ամեն կերպ խոչընդոտել Կարսի հակահայ պայմանագրի՝ հայկական ստորագրությամբ վերակնքումը, ինչ անունով էլ, որ այն փորձի մատուցվել:

 

Նոյեմբերի 9-ի եռակողմ կապիտուլյացիոն հայտարարությունից հետո Հայաստանը դեռևս ի վիճակի չէ լայնածավալ պաշտպանության ռուս-թուրքական հերթական հոշոտման դեմ, բայց դիմադրության ճակատներ կան, որոնցից հրաժարումը հավասար է ազգային ինքնասպանության:

 

Դրածո իշխանություններն ու ընդդիմությունը չեն փորձելու ցուցաբերել գոնե ասիմետրիկ պաշտպանություն ռուսական և թուրքական ճակատագրական ոտնձգություններից: Հակառակը՝ նրանք չեն հանդգնում ընդունել ԱՄՆ-ի, Ֆրանսիայի, Իրանի և Հնդկաստանի դաշնակցությունը:

 

Միայն լուսանցք քշված քաղաքացիներիցս է կախված վիրավոր մարմնով Հայրենիքի Հոգին ամրացնելը: Իսկ այդ Հոգին տրոփում է մեր Մայրենի լեզվի մեջ: Առայժմ այլ կերպ չկարողանալով հակադրվել ռուս-թուրքական չարաղետ պրոյեկտին՝ կոչ ենք անում և թախանձագին խնդրում ենք Կարսի հակահայ պայմանագրի օրվանից մինչև հայ-թուրքական և հայ-ռուսական պատերազմների հետևանքով կնքված 1920թ. դեկտեմբերի 2-ի Ալեքսանդրապոլի պայմանագրի օրը.

 

Դիմումներով ողողել Հայաստանի անձնագրային և ՔԿԱԳ (զագս) բաժինները՝ մեր ռուսերեն և թուրքերեն ազգանունները հայացնելու պահանջով:

 

Սոցիալական ցանցերում (մասնավորապես Ֆեյսբուքում) ռուսատառ մեր անուն-ազգանունները դարձնել հայատառ, ինչպես նաև լատինատառ մեր անուն-ազգանունները նախապես հավելելով հայատառով:

 

Դատապարտված են այն ազգերը, որոնց էլիտաները զուրկ են ազգային արժանապատվությունից և իրենց ժողովուրդներին առաջնորդում են դեպի վերացում: Հույսը միայն գիտակից քաղաքացին է:

 

Մինչև դեկտերմբերի 2-ը հայացնենք Հայաստանը – ոչ մի թուրքերեն կամ ռուսերեն անուն-ազգանվամբ քաղաքացի մեր երկրում: Այդժամ մենք պատրաստ կլինենք դիմագրավելու տարածաշրջանային գալիք արհավիրքին:

 

Միքայէլ Հայրապետեան

ՊԱՀՊԱՆՈՂԱԿԱՆ ԿՈՒՍԱԿՑՈՒԹՅԱՆ ՆԱԽԱԳԱՀ

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով