Մենք ապրում ենք մի տարածաշրջանում, որ եթե քեզ ապտակում են, դու չես պատասխանում, էլի են ապտակում ու փորձում խլել քո ունեցվածքը, դու չես պաշտպանում, էլի են խլում։ Այս մասին «Հայրենիք»-ի ճամբարականների հետ հանդիպման ժամանակ ասաց ԱԺ «Պատիվ ունեմ» խմբակցության ղեկավար Արթուր Վանեցյանը։
«Մենք չենք կարող պատերազմի սպառնալիքից վախենալով՝ ասենք, դե լավ թուրքերը թող գան, մտնեն մեր երկիր։ Թուրքը և ադրբեջանցին ապացուցում են, որ իրենց միակ նպատակը հայ ազգի բնաջնջումն է։ Նրանք չեն ուզում մեր հետ խաղաղ ապրեն, ուզում են, որ մենք ուղղակի չլինենք, ոչնչանանք։ Թուրքական յաթաղանը 21-րդ դարում փոխարինվել է թուրքական բայրաքթարով»,-նշել է Արթուր Վանեցյանը։
Վերջինս նշեց՝ հնարավոր էր այնպես անել, որ պատերազմ չլիներ և կարողանայինք պահպանել մեր հաղթողի կերպարը։ Արթուր Վանեցյանի խոսքով իշխանություններն իրենց անփորձության պատճառով մեզ հասցրեցին պատերազմի։
«Գիտակցելով է արել, թե չգիտակցելով, ունենք Արցախի 75 տոկոսի կորուստ, ունենք հազարավոր զոհեր, վիրավորներ, ունենք մեր երկրում չլուծված անվտանգային խնդիրներ»,-նշեց Արթուր Վանեցյանը։