Որևէ պաշտոնական հայտարարություն չի կարող արդարացնել նման անհարգալից վերաբերմունքը մեր հերոս զավակների մասունքների նկատմամբ. Մայր Աթոռը` դիահերձարանում զոհվածների աճյունների պահման պայմանների մասին

 

Մայր Աթոռն անդրադարձել է ՀՀ Առողջապահության նախարարության դատաբժշկական գիտագործնական կենտրոնի Կոտայքի մասնաճյուղի դիահերձարանի հատակին նետված ՀՀ զինծառայողների աճյունների մասին վկայող մամուլում տարածված լուրերին և դատապարտել զինվորականների աճյունների հանդեպ նման վերաբերմունքը:

Այս մասին «Արմենպրես»-ին հայտնում են Մայր Աթոռի  տեղեկատվական համակարգից:

Հաղորդագրության տեքստում ընդգծվում է, որ մամուլում հրապարակված լուսանկարները և ապա տարածված տեսանյութն առաջ են բերել հանրության, զոհվածների և անհայտ կորածների ընտանիքների արդար վրդովմունքն ու տարակուսանքը։

«Որևէ պաշտոնական հայտարարություն և բերված պատճառաբանություն չի կարող արդարացնել նման անհարգալից վերաբերմունքը մեր ժողովրդի հերոս զավակների մասունքների նկատմամբ։ Հայրենիքի պաշտպանության և մեր ժողովրդի անվտանգ ու խաղաղ կյանքի համար նահատակված քաջորդիների աճյունները, անկախ դրանց առնչությամբ իրականացվող գործընթացների, պետք է արժանանան պատշաճ ուշադրության։

Մայր Աթոռ Սուրբ Էջմիածինը խստագույնս դատապարտում է կատարվածը։ Այսօրինակ երևույթներն ավելի են խորացնում պատերազմի արհավիրքը վերապրած մեր ժողովրդի ցավն ու տառապանքը և անվստահություն հարուցում պետական պատկան կառույցների նկատմամբ, որոնք կոչված են օր առաջ կարգավորելու առկա զգայուն խնդիրները»,-ասվում է հաղորդագրության մեջ:

Ավելի վաղ համացանցում լուսանկարներ էին հայտնվել, որոնք փաստում էին, ՀՀ առողջապահության նախարարության «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղում Արցախյան 44-օրյա պատերազմում զոհված տղաների դիեր են եղել, որոնք պահվել են ոչ պատշաճ պայմաններում:

Հունիսի 2-ին ՊՈԱԿ-ի Աբովյանի մասնաճյուղի վարիչը և Արցախյան պատերազմի ընթացքում զոհված զինծառայողների դիերի և մասունքների պահման գործընթացում ընդգրկված 2 աշխատակից ազատվել են աշխատանքից:Ավելի վաղ համացանցում լուսանկարներ էին հայտնվել, որոնք փաստում էին, որ ՀՀ առողջապահության նախարարության «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղում Արցախյան 44-օրյա պատերազմում զոհված տղաների դիեր են եղել, որոնք պահվել են ոչ պատշաճ պայմաններում: Այսօր Աբովյանի դիահերձարանի վարիչը և 2 աշխատակից ազատվել են աշխատանքից:

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով