Այս իշխանությունների կողմից փչացված հարաբերությունների պատճառով մենք չկարողացանք Վրաստանի կամ Իրանի տարածքով բերել այնպիսի քանակությամբ զենք կամ այն արագությամբ այդ զենքերը տեղափոխել Հայաստան, որպեսզի կարողանայինք դիմակայել թուրք-ադրբեջանական ագրեսիային: Այդ մասին Armnews-ի եթերում հայտարարեց «Պատիվ ունեմ» դաշինքի վարչապետի թեկնածու, «Հայրենիք» կուսակցության նախագահ Արթուր Վանեցյանը:
Վանեցյանի խոսքով, Վրաստանի և Իրանի հետ Հայաստանն ունեցել է շատ լավ հարաբերություններ:
«Ես անձամբ այդ երկու երկրների հատուկ ծառայությունների ներկայացուցիչների, ղեկավարների հետ ունեցել եմ փայլուն հարաբերություններ և այդ հարաբերությունների արդյունքում կարողացել ենք լուծել բազմաթիվ հարցեր՝ի նպաստ ՀՀ-ի»,-նշել է նա:
Ըստ նրա, ՀՀ-ն չպետք է իր արտաքին հարաբերությունները կառուցի երկրների շահերի բախման հաշվին՝այլ արտաքին գործընկերների հետ Հայաստանը հարաբերությունները պետք է կառուցի հայկական շահերի և նրանց շահերի հատման հաշվին: