Այս թալանչիները խոսում են կոռուպցիայի մասին, բայց ամենամեծ թալանչիները իրենք են: Այսօր ընտրողների հետ հանդիպման ժամանակ հայտարարել է «Պատիվ ունեմ» դաշինքի վարչապետի թեկնածու, «Հայրենիք» կուսակցության ղեկավար Արթուր Վանեցյանը՝ ավելացնելով, որ այս իշխանությունները շատ խորամանկ ձևով են թալանում բոլորիս:
«Պարզ օրինակ, իրենք գնում են քարոզարշավի և դուք տեսաք, թե ինչքան մարդկանց են իրենց հետ տանում տարբեր մարզեր, ինչքան մեքենաներ են ուղեկցում այս կապիտուլյանտին: Այս ամենը արվում է մեր բոլորի գումարներով, պետբյուջեի հաշվին»,- շեշտել է Վանեցյանը՝ նշելով, որ թյուր է այն կարծիքը, թե Փաշինյանը աջակիցների մեծ բանակ ունի:
«Հազար և ավել դոլարներ իրենք ծախսում են ֆեյքեր պահելու համար»,- նկատել է գործիչը։ Մինչդեռ, այդ գումարով կարող էին ուսուցչի, բժիշկի աշխատավարձ բարձրացնել։
«Կարող ենք երկար խոսել իրենց անհիմն պարգևավճարների մասին, անհիմն ծախսերի մասին, անգամ պատերազմի ժամանակ: Գողն առաջինն է գոռում, որ գողացան, որպեսզի իրեն չբռնեն»,- շեշտել է Վանեցյանը: