Արարատի մարզում այսօր՝ մայիսի 24-ին, ժամը 07:20-ի սահմաններում, «Արտաշատ» բժշկական կենտրոնից ոստիկանության Արտաշատի բաժին ահազանգ է ստացվել, որ մարմնի տարբեր հատվածների կտրած, ծակած բազմակի վերքերով իրենց մոտ է տեղափոխվել մի կին:
Shamshyan.com-ի հաղորդմամբ՝ բժիշկները ոստիկաններին հայտնել են, որ վիրավորը գտնվում է վիրահատարանում, նրա վիճակը ծայրահեղ ծանր է ու ի վիճակի չէ կատարվածի մասին բացատրություն տալու: Պարզվել է, որ հիվանդանոց տեղափոխվածը Արտաշատ քաղաքի բնակիչ, 67-ամյա Անահիտ Հ.-ն է:
Պարզվել է, որ նույն օրը՝ ժամը 06:30-ի սահմաններում Արտաշատ քաղաքի բնակարաններից մեկում Անահիտ Հ.-ի հետ վիճաբանել է Արտաշատի բնակիչ, 27-ամյա Աշոտ Հ.-ն, ով խոհանոցային դանակով բազմաթիվ հարվածներ է հասցրել Անահիտ Հ-ի մարմնի տարբեր մասերին:
Ոստիկանները հայտնաբերել են կասկածյալ Աշոտ Հ.-ին եւ բերման ենթարկել ոստիկանության Արտաշատի բաժին: Հայտնաբերվել է նաեւ հանցագործության գործիք դանակը:
Փաստի առթիվ ՀՀ ՔՕ 34-104 հոդվածի 1-ին մասի (սպանության փորձ) հատկանիշներով հարուցվել է քրեական գործ եւ այն փոխանցվել է Հայաստանի քննչական կոմիտեի Արարատի մարզային քննչական վարչություն:
Քննչական վարչություն է ներկայացվել նաեւ կասկածյալը, ով քննիչի որոշմամբ ձերբակալվել է:
