168.am-ը գրում է․ Ռուսաստանից Հայաստան զրահաբաճկոններ տեղափոխող երկու բեռնատարները մեկ ամիս 3 օր մնացին «Վերին Լարս» անցակետում ու այդպես էլ, ցավոք, առաջ չեկան, և օգնությունը տեղ չհասավ։ Բեռնատարներն ուղարկվել են Մոսկվայից մարտի 5-ին՝ որպես հումանիտար օգնություն։ Մարտի 28-ին Վրաստանի սահմանապահներն առգրավել են վարորդների փաստաթղթերը՝ արգելելով նրանց առաջ շարժվել:
«Հետ ենք գնում։ Գրեք, թող բոլորն իմանան, թե ինչ անգործության են մատնված Վրաստանի դեսպանատանը։ Զանգում, մեզնից են իմանում, որ վաղը Վրաստանում ոչ աշխատանքային օր է։ Իրենք էլ կոչվում են դեսպանատան աշխատողներ։ Գիտե՞ք, թե այս ընթացքում ինչքան գումար ծախսվեց, ու զրո արդյունք»,- 168.am-ի հետ զրույցում ասաց բեռնատարներից մեկի վարորդը։
«Փաստաթղթեր պահանջեցին, ներկայացրեցինք, դրանից հետո պետք է հանձնաժողովի քննարկմանը ներկայացնեին ու 15-օրյա ժամկետում պարտավորվում էին թույլ տալ։ Ժամկետը լրացել է ապրիլի 26-ին»,- ասել էր բեռնատարի վարորդը։
Վրաստանում ՀՀ դեսպանությունից էլ հարցի հետ կապված հայտնել էին, որ աշխատանքներն ընթացքի մեջ են, հարցը կկարգավորվի։
