Նիկոլ Փաշինյանը կառավարության 3-րդ մասնաշենքում է։ Մինչ նրա գալը, արդեն հարյուրավոր ոստիկաններ էին փակել կառավարության 3-րդ մասնաշենք տանող բոլոր ճանապարհները։ Իսկ արդեն նրա ժամանելուց հետո հավաքված քաղաքացիների նկատմամբ ոստիկանները սկսեցին ուժ կիրառել, այդ թվում՝ նաև ՀՀԿ և ՀՅԴ երիտասարդների նկատմամբ։ Նրանք բերման ենթարկեցին ՀՅԴ ԳՄ ներկայացուցիչ, «Հայրենիքի փրկության շարժման» համակարգող Իշխան Սաղաթելյանին, ուժի գործադրման հետևանքով Իշխան Սաղաթելյանի դեմքից արյուն էր հոսում։
Քաղաքացիներից մեկը փորձեց թույլ չտալ, որպեսզի ոստիկանները բերման ենթարկեն Իշխան Սաղաթելյանին, սակայն կարմիր բերետավոր տասնյակ ոստիկաններ վազեցին նրա հետևից՝ փորձելով կրկին բերման ենթարկել։
Հավաքվածները փորձեցին ոստիկաններից բացատրություն պահանջել, թե ինչու են նրան տանում, քանի որ հանգիստ կանգնած է։ Քաղաքացիները ոստիկաններին նաև կոչ արեցին հանգիստ թողնել Իշխան Սաղաթելյանին՝ հաշվի առնելով, որ դեմքից արյուն է հոսում, սակայն վերջիններս շարունակեցին իրենց գործողությունները, այդուհանդերձ քաղաքացիներին հաջողվեց իրենց հետ տանել Իշխան Սաղաթելյանին։
Հասնելով ՀՅԴ գրասենյակի մոտ՝ Իշխան Սաղաթելյանն ասաց, որ ոստիկանները շարունակում են կատարել «թուրքի ու դավաճանի հրահանգները»։
