Մենք բոլորս տեսնում ենք, որ պատերազմը չի ավարտվել: Մենք հասկացանք, որ պարտությունը ոչ թե միանվագ, այլ տեւական հասկացություն է։ Նիկոլի ու նրա թիմի ինքնասիրության բացակայությունն ու թշնամուն քծնելը թույլ չի տալիս հայ ժողովրդին ուշքի գալ, ինքնակազմակերպվել ու փորձել ամեն ինչ սկսել զրոյից։ Այս մասին իր Տելեգրամ ալիքում գրել է Սուրբ Աթոռում ՀՀ նախկին դեսպան Միքայել Մինասյանը:
Ամեն օր Նիկոլն ու իր թիմը նվաստանում ու նվաստացնում են մեզ բոլորիս։ Ադրբեջանն ու Թուրքիան սպառնում են, իսկ Նիկոլի թիմը խոսում է տարածաշրջանային համագործակցության մասին։ Ադրբեջանն ու Թուրքիան նոր զորավարժություններ են անցկացնում, Իսկ Նիկոլը խոսում է սահմանների բացման մասին։
Սա տեւում է արդեն 4 ամիս։ Փաշինյանը և նրա կապիտուլյացիոն թիմը շարունակում են նվաստանալ, հանձնել նոր տարածքներ, ոչնչացնել բանակցային դիրքերը, իրավիճակը շտկելու ցանկացած հեռանկար։ Նրանք հույս ունեն, որ Ալիևի հետ զիջախաղ խաղալով նրանք կկարողանան ինչ-որ բան ստանալ, ինչը կօգնի նրանց մնալ իշխանության։
Այդ պարտիայի քայլերից մեկը՝ ԱԱԾ տնօրեն Արմեն Այվազյանի, Արայիկ Հարությունյանի, Ռուստամ Մուրադովի և Ադրբեջանի պետական անվտանգության ծառայության նախագահ Ալի Նագիևի նախատեսված հանդիպումն է։ Գաղտնի հանդիպումը, որի մասին Արմեն Աբազյանը պայմանավորվել էր վերջերս Մոսկվա կատարած իր այցի ժամանակ, տեղի կունենա մոտ օրերս՝ շփման գծում՝ Մատաղիսից ոչ հեռու։ Աբազյանը, Հարությունյանը և Նագիևը նախատեսում են քննարկել «ենթակառուցվածքային հարցեր», իսկ ըստ էության՝ Արցախի մնացորդների ինտեգրման քայլերը Ադրբեջանի կազմ։
Մենք պետք է հասկանանք, որ դա պարզապես ֆիկտիվ հանդիպում չէ. դա հայոց պետականության քայքայման ծրագրի կատարումն է, այն բանի, ինչի համար Նիկոլը մնում է իշխանության։
Հայաստանի նվաստանալու պատրաստակամությունը միայն խթանում է՝ Նիկոլից ավելի մեծ տարածքներ, զիջումներ, երաշխիքներ քամելու Թուրքիայի և Ադրբեջանի ցանկությունը։ Չի կարող և չպետք է մեկ մարդ անպատիժ և դաժանաբար նվաստացնի սեփական հայրենիքն ու ժողովրդին։ Իսկ դա նշանակում է, որ պատմական, իրավական և բարոյական պատասխանատվության ժամը մոտ է։ Շատ մոտ է։
