Ինձ ներկայացրեցին որպես վարչապետի միասնական թեկնածու, բայց ես այստեղ եմ որպես Վազգեն Մանուկյան

«Ինձ ներկայացրեցին որպես վարչապետի միասնական թեկնածու, բայց ես այստեղ եմ որպես Վազգեն Մանուկյան, որը ձեզ հետ միասին կազմակերպել է 88-ի Շարժումը, հանդիպել է ձեզ ռազմաճակատում, ապա պայքարի ժամանակ, երբ ուզում էինք, որ մեր երկիրը լինի մեր երազած երկիրը: Ակունքներից սկսած՝ մենք միասին ճանապարհ ենք անցել». այս խոսքերով այսօր սկսեց Վազգեն Մանուկյանն իր ելույթը Արարատում քաղաքացիների հետ հանդիպմանը:

Նա մի շարք կարևոր արձանագրումներ արեց, որոնք ներկայացնում ենք ամփոփ.

Ի՞նչ իրավիճակում ենք հիմա

1. Երևի թե վերջին հարյուր տարվա ընթացքում երբեք այսքան վտանգավոր վիճակում չենք եղել, ինչ այսօր: Բայց ոչ բոլորն են խորը պատկերացնում այդ վիճակը:

2. Ադրբեջանը պատրաստվում էր հաղթանակի, մենք՝ պարտության: 2018 թվականից սկսած մենք կոռուպցիայի անվան տակ սկսեցինք ջարդել բանակը:

3. Պատերազմի ժամանակ՝ հոկտեմբերի 3-ին, Ֆրանսիան մեզ առաջարկեց զենք, որով կարող էինք պայքարել թռչող սարքերի դեմ: Մենք հրաժարվեցինք: Հոկտեմբերի 11-ին Ֆրանսիան նորից առաջարկեց, նորից հրաժարվեցինք:

4. Սա պատերազմ չէր, սա սպանդանոց էր: Մարդկանց տանում էին սպանելու ու սպանեցին:

5. Գաղտնի բանակցությունների արդյունքում Շուշին հանձնվեց թշնամուն:

6. Ռուսաստանը մի քանի անգամ առաջարկեց պատերազմը կանգնեցրել, չհամաձայնեցին:

7. Սա դիտավորյալ պարտված պատերազմ էր: Չի կարող հիմարությունների շարանն այսքան հետևողական լինել:

8. Ո՞րն էր դիտավորության նպատակը. նպատակը Արցախից ազատվելն էր: Դեռ 2008-ից գնում էին խոսակցություններ՝ հայաստանցի, ղարաբաղցի, խոսակցություններմ, որ Ղարաբաղը մեզ համար բեռ է:

9. Նպատակը նաև մեզ Ռուսաստանից պոկելն էր: Ռուսաստանի հետ մեզ կապող ամենամեծ պարանը Արցախի հարցն էր: Չկա Արցախի հարց, չկա Ռուսաստան, և Անդրկովկասն ամբողջությամբ անցնում է Թուրքիայի տիրապետության տակ: Այս խնդիրը շարունակվում է լուծվել: Գաղտնի բանակցություններ են ընթանում Թուրքիայի և Ադրբեջանի հետ:

10. Նիկոլն ասում է, թե ստորագրեց այդ փաստաթուղթը, որ կանգնեցնի պատերազմը: Սուտ է ասում: Իրեն Ռուսաստանը պարտադրեց: Ռուսաստանի շահը պահանջեց, որ Նիկոլը ստորագրի այդ փաստաթուղթը և կանգնեցնի պատերազմը: Այնինչ կարող էր շաբաթներ, օրեր առաջ դա անել:

11. Փաստաթուղթը ստորագրելուց հետո էլ մեր պարտությունները շարունակվեցին: Վտանգվեց Սյունիքը:

12. Ասում են՝ ճանապարհները կբացեն, կօգտվենք: Սուտ են ասում: Այդ ճանապարհներից օգտվելու են Թուրքիան ու Ադրբեջանը:

13. Ոմանք ասում են՝ մենք կորցրինք Արցախը: Այո, բայց ամեն ինչ կորած չէ:

14. Շատերը նույնիսկ չեն պատկերացնում, թե ինչ է Արցախի կորուստը: Ազգայինից բացի մենք ունեցանք հսկայական նյութական կորուստ:

15. Մենզ կարողացանք ունենալ անկախ պետություն, հաղթել և այս տարածաշրջանում մեր բանակը համարվում էր ամենահզորը, ամենահարգվածը, որի հետ հաշվի էին նստում: Հիմա մեզ հետ հաշվի չեն նստում:

16. Մենք կորցրեցինք ոչ միայն Արցախը, ոչ միայն մեր բանակը, այլև մեր տղամարդկությունը:

17. Նիկոլ գոռացողները տղամարդ չեն, նրանց մեջ նամուս չկա, խիղճ չկա, ազգային ոչինչ չկա:

18. Նիկոլը փորձում է ջնջել վերջին հարյուր տարվա մեր պատմությունը: Թույլ չե՛նք տալու:

19. Ամեն ինչ արվում է, որ մենք լինենք թույլ, առևտրական, չպաշտպանված, բանակ չունեցող մի ժողովուրդ: Թույլ չե՛նք տալու:

20. Չմտածեք, որ առանց բանակի, առանզ հզորացման կարող ենք հարստանալ ու բարգավաճել: Բարգավաճում են այն ժողովուրդները, որոնք ապրում են պաշտպանված, հզոր երկրում:

Ի՞նչ անել ու ինչպես

1. Հիմա գնում ենք սահմանադրական ճանապարհով և ուզում ենք դուրս վռնդել Նիկոլ Փաշինյանին: Եթե սահմանադրական ճանապարհն արդյունք չբերի, պետք է ապստամբություն անել, և դա ժողովրդի բնական իրավունքն է:

2. Չեն գնա սահմանադրաան ճանապարհով, կգնան ապստամբությամբ, որովհետև սա մեր երկրի և ժողովրդի ապագայի հարցն է: Կա՛մ մենք կործանվում ենք, կա՛մ գնում ենք առաջ:

3. Մենք ճանապարհ պիտի ընտրենք, որով հաջորդ իշխանությունները պիտի գնան:

4. Բանակի վերականգնում, պաշտպանության ամրապնդում:

5. Ներսի անվտանգության ապահովում: Պետք է ընդունել օրենքներ և վերահսկել այն բոլոր կազմակերպությունները, որոնք դրսից գումար են ստանում:

6. Կրթություն: Մեր երեխաներին պետք է կրթել՝ դարձնելով ժամանակակից աշխարհի հետ համահունչ, ազգային մտածողություն, ազգային հպարտություն ունեցող քաղաքացիներ:

7. Կոռուպցիայի դեմ պետք է պայքարել՝ որպես ազգային անվտանգության սպառնալիք: 100 տոկոս կոռուպցիան վերացնել հնարավոր չէ, բայց իշխանական վերնախավում չպետք է լինի կոռուպցիա, վերնախավը պետք է ծառայի պետությանը:

8. Համաշխարհային հայության ներուժի համախմբումն ու ազգային միասնական մթնոլորտի վերաանգնումը շատ կարևոր են:

9. Պաշտպանվածություն, հզոր բանակ, ազնիվ, երկրին նվիրված, խելոք իշխանություններ: Սա է ճանապարհը: Մենք պետք է կարողանանք այս ճանապարհով գնալ և վերականգնել մեր երկիրը:

10. Մենք նորից ոտքի՛ ենք կանգնելու: Մենք ունենալու ենք տարածաշրջանի ամենահզոր բանակը: Մեզ հետ հաշվի են նստելու և՛ Ռուսաստանը, և՛ Թուրքիան, և՛ Ադրբեջանը:

11. Մեր բանակը, մեր երկիրը հզորացնելուց հետո մենք կսպասենք: Ինչ կատարվի Թուրքիայում, կօգտվենք: Եթե մի բան պատահի Ռուսաստանում, կպաշտպանվենք: Եթե ավելի բարդ խաղեր լինեն, այդ խաղերը կխաղանք: Բայց խաղացողը պետք է ուժեղ լինի: Դա է իմ կոչը՝ ուժեղանալու կոչ: Մնացած ամեն ինչ հետևանք է լինելու դրան:

Հայրենիքի փրկության շարժում