Ադրբեջանի նախագահ Իլհամ Ալիեւը ՄԱԿ-ի Գլխավոր ասամբլեայի 75-րդ նստաշրջանի բացման արարողությանը հղած տեսաուղերձում բողոքել է Հայաստանից թե խախտում է բանակցությունների ձեւաչափը:
Ադրբեջանական լրատվամիջոցների հաղորդմամբ` Ալիեւը ասել է, թե Հայաստանի վարչապետը հայտարարել է տասնյակ հազարավոր զինված քաղաքացիական անձանց կամավորական ջոկատների ստեղծման մասին, որոնց «կստիպեն» մասնակցել Ադրբեջանի դեմ ռազմական գործողություններին: Դա ցույց է տալիս Հայաստանի ղեկավարության նոր ագրեսիվ մտադրությունները։ Հայաստանի պաշտպանության նախարարը Ադրբեջանին սպառնում է «նոր պատերազմով նոր տարածքների համար»։
Իլհամ Ալիևը նշել է, որ Հայաստանի վարչապետը նպատակաուղղված կերպով խախտում է բանակցությունների ձևաչափն ու էությունը, որոնք անցկացվում են ԵԱՀԿ Մինսկի խմբի համանախագահների միջնորդությամբ:
«Նրա՝ «Ղարաբաղը Հայաստան է» հայտարարությունը լուրջ հարված է բանակցային գործընթացին։ Նա անհիմն պայմաններ է առաջադրում բանակցային գործընթացում։ Ադրբեջանի հանդեպ նրա անընդունելի «յոթ պայմանները» մերժվեցին մեր կողմից։ Մենք ընդամենը մեկ պայման ունենք խաղաղության հասնելու համար։ Հայաստանի զինված ուժերը պետք է դուրս բերվեն Ադրբեջանի բոլոր գրավյալ տարածքներից», – նշել է Ալիեւը ու ոչ ավել, ոչ պակաս հայտարարել, թե, իբր, «ամբողջ աշխարհը Լեռնային Ղարաբաղը ճանաչում է որպես Ադրբեջանի բաղկացուցիչ մաս»:
Ըստ Ալիեւի` ՀՀ վարչապետի ագրեսիվ հռետորաբանությունն ու սադրանքները ցույց են տալիս Հայաստանի պատրաստվածությունը Ադրբեջանի դեմ նոր ագրեսիայի:
«Մենք կոչ ենք անում ՄԱԿ-ին եւ միջազգային հանրությանը ազդել Հայաստանի վրա եւ թույլ չտալ նոր ռազմական ագրեսիա», – ասել է Երկրի ղեկավարը:
