Քիչ առաջ Ոստիկանության մոտից բերման են ենթարկվել մի խումբ քաղաքացիներ ու քաղաքական-հասարակական գործիչներ: Հիշեցնենք, որ նրանք Ոստիկանւթյան դիմաց հավաքվել էին Արթուր Դանիելյանին աջակցություն ցուցաբերելու համար, ում այսօր հրավիրել են Ոստիկանության 6-րդ վարչություն:
Որոշ տեղեկություններով՝ բերման ենթարկվածների թվում է նաև ՀՀԿ ԵԿ ղեկավար Հայկ Մամիջանյանը, ինչպես նաև «Ադեկվադ»-ի թիմը։
Քիչ առաջ Մարինե Մանուչարյանը ֆեյսբուքյան իր էջում տեսանյութ էր տարածել ոստիկանության դիմաց տեղի ունեցող իրավիճակի վերաբերյալ, որի ժամանակ բերման ենթարկեցին նաև իրեն:
«Ադեկվադ» միաբանության անդամ Լիլիթ Թումանյանի փոխանցմամբ՝ «Ադեկվադ» միաբանության անդամներից մոտավորապես 20 հոգի բերման է ենթարկվել ոստիկանության աշխատակիցների կողմից.
«Պաշտոնական բացատրությունն այն է, որ չեն ենթարկվել պարետի որոշմանը, բայց ես տեղյակ եմ, որ միաբանության անդամները պահպանել են սոցիալական հեռավորություն։ Չի եղել որևէ խախտում, հակառակը, ոստիկաններն են ավելի շատ: Իրականում սոցիալական հեռավորության պահպանումը և, առհասարակ, արտակարգ դրության ռեժիմի պահպանումն արվում է բացառապես որպես քաղաքական մահակ։ Ընտրողական մոտեցում է ցուցաբերվում, որովհետև հիմա Կասկադում, եթե զբոսնեք, կտեսնեք ավելի շատ մարդ ավելի փոքր տարածքում։ Խնդիրը և դրդապատճառները քաղաքական են» ։
