Մենք ամեն օր հետևություններ ենք անում, ամեն օր փորձում ենք վերադասավորել մեր առօրյա անելիքներն՝ կախված կորոնավիրուսի տնտեսական հետևանքների հետ և այն, ինչը մենք անում ենք, պահանջված է: Այս մասին «Ազատություն» Ռ/Կ «Ֆեյսբուքյան ասուլիսի» ժամանակ ասաց ՀՀ էկոնոմիկայի նախարար Տիգրան Խաչատրյանը՝ անդրադառնալով կորոնավիրուսի հետևանքները չեզոքացման կառավարության աջակցության միջոցառումներին:
«Արդեն հայտարարել ենք 150 միլիարդ դրամ ընդհանուր ծավալով աջակցության ծրագրերի ներդրման մասին, որոնք բաժանված են 2 մասի: Առաջինը՝ արագ արձագանքման միջոցառումներն, իսկ երկրորդ փուլում իրականացվելիք միջոցառումներն ավելի երկարատև են, որոնց մասին կարող ենք խոսել այն ժամանակ, երբ արդեն պարզ կլինի, թե ինչպիսի փոփոխություններ են արձանագրվել համաշխարհային տնտեսության մեջ»,- ասաց Խաչատրյանը:
Նախարարը հայտնեց, որ ընդհանուր առմամբ նախարարության ծրագրերով մոտավորապես 6 հազար տնտեսավարող սուբյեկտներ ֆինանսավորվել են, որից 5 հազարը ֆինանսավորվել են միկրովարկերի համար: «Այսօրվա դրությամբ 7,1 միլիարդ դրամ վարկավորում ունենք` հաստատված վարկեր, շահառուների թիվը` մոտ 630, այդ թիվն ամեն օր է փոխվում: 5-րդ միջոցառմամբ, որը վերաբերում էր մարտին իրենց աշխատատեղերն ու աշխատավարձի չափերը պահպանած կազմակերպություններին, եղել է մոտ 2 միլիարդ դրամի աջակցություն: Մենք գտնում ենք, որ այդ միջոցառումներն արդեն իսկ բավականին արդյունավետ են, այսպիսի աջակցությունը շարունակական է լինելու այն տրամաբանությամբ, որ հրատապ աջակցության միջոցառումներից անցում ենք կատարելու դեպի երկարաժամկետ աջակցության գործիքակազմ: Դա տեղի կունենա այն ժամանակ, երբ առաջին կտրուկ փոփոխության ժամանակահատվածը կհամարենք արդեն հասկացված և ամփոփված և կպլանավորենք այն հարթության մեջ, որոնք օգնում են կազմակերպություններին վերադասավորվելու և ընտրելու իրենց զարգացման ուղին»,- ասաց Տիգրան Խաչատրյանը:
Խաչատրյանը, արդնադառնալով անվտանգության կաննոները չպահպանելու խնդրին, ասաց, որ հետևողական են լինելու, որպեսզի այդ կազմակերպությունները գտնվեն խիստ կանոնների դաշտում:
Գազի գնի հնարավոր վերանայման մասին Խաչատրյանն ասաց, որ գազի թանկացումը միշտ էլ դժվարություններ ստեղծող է: «Գազի գնի փոփոխությունները մշտապես լինելու են մեր կողմից, հասարակության կողմից ամենից շատ քննարկվող թեմաներից: Ընդհանրապես տնտեսությունն է այդպիսին, բոլոր ռեսուրսներն են ժամանակի մեջ ունենում գնի փոփոխություն. մենք մի դեպքում ավելի շատ ուշադիր ենք, ավելի շատ ենք նկատում դա: Մենք պետք է օգտագործենք բոլոր հնարավորությունները, որոնք թույլ կտան ունենալ հավասարակշռված էներգետիկ համակարգ` մենք պետք է նաև մեր տնտեսությունը դարձնենք ավելի քիչ խոցելի դրսի ազդեցություն ունեցող գործոններից, այսինքն` եթե արևի, քամիների ռեսուրսը կարողանանք ավելի շատ օգտագործել, ավելի քիչ կախված կլինենք նաև գազի և այդ եղանակով էլեկտրամատակարարման գնի փոփոխություններից»,-ասաց նա:
Ինչ վերաբերում է «Վալեքս գրուպ»-ի վերաբերող հարցին, որի ֆինանսական տնօրենը եղել է նախարարը և իրենից հետո ընկերությունում ստեղծվել է ֆինանսական ճգնաժամ. դիտարկմանը, թե այդ ընկերությունը տարիներ շարունակ խաբել է պետությանը` թաքցնելով իրական արդյունահանման ծավալները՝ Տիգրան Խաչատրյանն արձագանքեց, որ դա որևէ մեկի գործողությունների արդյունքում չի եղել: «Ոչ էլ դա անգործության հետևանք է եղել: Եղել է շուկայական որևէ պայմանների արդյունքում առաջացած հետևանք: Ես ամենևին չեմ կարծում, որ իմ նախկին մասնագիտական գործունեությունը կարող է որևէ կերպ ազդել այն պատասխանատվության և անելիքների վրա, որոնք ես այսօր ունեմ»,-ասաց նա: