Փաստաբան Տիգրան Աթանեսյանն այսօր հրավիրված մամուլի ասուլիսին անդրադառցավ երեկ իր և իր ընտանիքի անդամների հետ տեղի ունեցած միջադեպին:
Տիգրան Աթանեսյանի խոսքով՝ իրեն չեն ներում, որ ինքը եղել է Նիկոլ Փաշինյանի փաստաբանը ու հիմա ունի ամբողջությամբ հակառակ դիրքորոշում Փաշինյանի վարած քաղաքականությանը։
«Ինձ և ընտանիքիս սպառնացող անձինք սերտ կապեր ունեն այս իշխանությունների հետ:
Այս ամենը, որ այս երկրում դարձել է հնարավոր, այո, ես մեղադրում եմ այս իշխանությանը, ի՞նչ են դարձրել էս երկիրը՝ հայհոյանքը նորմալ է, փնթի, կենցաղային բառերը դարձել են նորմալ, գրական հայոց լեզու, արդեն երեխային կարելի է հայհոյել ու հարձակվել երեխայի վրա, այո, Նիկոլ Փաշինյանը պատասխանատու է սրա համար, սա իր օրոք է ու հովանավորվում է իր օրոք», — ասաց Աթանեսյանը։
«Ես ավելի քան համոզված եմ, որ այն, ինչ-որ տեղի է ունեցել, ունի կազմակերպիչներ: Այդ ստահակները չեն դա անում, կան կազմակերպիչներ և հաշվի առնելով կապերը իշխանության հետ, շատ սերտ կապերը, համոզված եմ, որ այդտեղից էլ գալիս է, որովհետև ինչո՞ւ պետք է նախ էդ հարձակումը լիներ, ինչո՞ւ պետք է ընտանիքիս վրա, ու ինչո՞ւ պետք է անընդհատ նշեին իմ փաստաբան լինելը, իրենց կյանք ուտելը և մնացածը:2 օր է՝ իմ ընտանիքի հանդեպ ոտնձգություններ են լինում: Կարծես թե սկզբից ինչ-որ կենցաղային վիճակ էր: Ես ապրում եմ Քանաքեռի մասնավոր հատվածում և իմ տանն ամիջապես կպած գտնվում է Քանբաքեռի հին կինոթատրոնը, ներկայոււմս՝ ձայնագրման ստուդիա է դա կոչվում: Այդտեղ կա փոքրիկ մանկական հրապարակ, երեխաներս միշտ գնում, խաղում են՝ բոլոր երեխաները հարևանների: Եվ այսպես կոչված, տիրոջ որդին՝40 տարեկան, պահանջում է, որ իմ երեխաները իրավունք չունեն այդտեղ այլևս խաղալու, «իրա երեխեքը չպետք է խաղան, էդ փաստաբանը մեր սաղիս կյանքը կերավ», բայց էդ անձի հետ ես որևէ հարաբերություն չունեմ, չեմ էլ ճանաչում նորմալ, դեմքը գիտեմ:
Երկրորդ օրը՝ իմ և այդ հիմնարկը բաժանող ճաղավանդակ կա, որոշում են ամբողջությամբ պատնեշով փակեն: Դե իրենց ճաղավանդակն է, փակում են, կինս զանգում է, ասում եմ ՝ «ինչ ուզում է, թող անեն, ուշադրություն մի դարձրա»: Ես հասկանում եմ, որ սադրանք է սա:
Տիգրան Աթանեսյանի ասաց,որ իր բնակարանի մոտ ընտանիքի անդամների հասցեին հայհոյանքներ ու սպառնալիքներ են հնչել։
Եվ այդ ընթացքում, տեսնելով, որ սրա վրա էլ ոնց որ ռեակցիա չկա, երեխայիս, որ առաջին հարկի պատուհանից նայում է՝ ինչ են անում, հայհոյում են ամենավերջին ստոր, սեռական բնույթի հայհոյանքներով, 7 տարեկան տղայիս հայհոյում են հասուն մարդիկ՝ 40-ն ամենաերիտասարդն է, մեջները 70 տարեկան մարդ էլ կա: Մոտենում են, ուզում են խփել, կինս վազում է դուրս, պատշգամբից է դուրս գալիս, շուրջ 5-6 րոպե ամենավերջին ստոր հայհոյանքները կնոջս հասցեին՝ «ձեր տունն ենք քանդելու» և նորից նշում են իմ փաստաբան լինելը: Կինս զանգում է ինձ, ես շտապ, ինչքան հանրավոր է, հասնում եմ տուն, հասկանում եմ, որ սադրանք է, հասկանում եմ, որ պատճառ չկա նման ստորությանը՝ ոչ գողական, ոչ նորմալ ինչ-որ հասկացողություններով տան վրա, երեխեքի վրա հարձակումը չունի արդարացում, նույնիսկ եթե իմ հետ կոնֆլիկտ ունենային էդ մարդիկ: Բայց նորից եմ ասում՝ չեմ ճանաչում, մեկին դեմքով գիտեմ»,-ասաց փաստաբան Տիգրան Աթանեսյանը:
Աթանոսյանի մեկնաբանությամբ տեղի ունեցածում կենցաղային առիթներ պետք չէ փնտրել. դրանք չկան: Ըստ նրա՝ հարձակումն ուղիղ կապ ունի իր մասնագիտական գործունեության, «նոր իշխանության օրոք տարածում գտած քաղաքական հետապնդումների ժամանակ այդ քաղաքական հետապնդումների ենթարկվող անձանց պաշտպանելու հետ»: Նման տեսակետ փաստաբանն արտահայտեց համադրելով այսօրվա ու անցյալի դեպքերը:
«Բոլորդ կհիշեք, որ մի քանի տարի առաջ մեր քաղաքապետ Հայկ Մարությանը ինչ-որ մի հատ PR ակցիա էր կազմակերպել, սնունդ էր բաժանում: Դա եղել է հենց այդ հիմնարկում: Նրանք շատ սերտ կապեր ունեն ներկայիս իշխանավորների հետ: Օրինակ, Հովհաննես Ազոյանը, մեր դերասանը, պարբերաբար գիշերները էդտեղ ինչ-որ անհասկանալի միջոցառումներ է կազմակերպում: Ինչո՞վ են զբաղվում՝ չգիտեմ: Բայց որ բոլորին խանգարում են, իրենց ծառայողական մեքենաներով, ուրախ-ուրախ, դե հիմա կյանքի տերերն են, գալիս-լցվում են այդտեղ»,-ասաց Տիգրան Աթանեսյանը:
Խոսքը 2014 թվականին Հայկ Մարությանի նախաձեռնած «Հույսի» ավանում և Քանաքեռում իրականացրած բարեգործական ծրագրի մասին է:
Աթանեսյանը նաև դիմել է պահնորդական ծառայության, որպեսզի իր տանն իրականացվի շուրջօրյա պահպանություն։
«Տնից պետք է դուրս գամ, չեմ կարող անընդհատ տանը նստել, շուրջօրյա պահպանություն է իմ տանը իրականացվում, շատ տհաճ վիճակ է, բայց ասեմ՝ եթե մեկնումեկը փորձել է ինձ սրանով վախեցնել, չարաչար սխալվել է, նա ինձ չի ճանաչում, կրկնակի էներգիայով պայքարելու եմ այս խայտառակության դեմ», — ասաց փաստաբանը։
