Քաղաքագետ Գարեգին Պետրոսյանը ֆեյսբուքյան իր էջում գրում է.
«Սասնա ծռեր» կուսակցության ներկայացուցիչներին դեմոնստրատիվ կերպով իր մոտ ընդունելով Նիկոլ Փաշինյանը վերջնականապես ապացուցեց, որ արտաքին քաղաքականության ռուսական օրակարգն ամբողջությամբ սպառված է:
Այն որ ծռերին կուսակցություն կարելի է անվանել խիստ վերապահումով, կարծում եմ, սրա մասին բոլորից լավ գիտի հենց Փաշինյանը, բայց հենց նրանք են հարմար գործիքակազմ ՝ Ռուսաստանին իր կարծիքով «հակահարվածներ» ուղղելու համար: Բայց սա թերևս միայն վարչապետի կարծիքն է, որտեղ հետևանքները հաշվարկված և գնահատված չեն: Իսկ հայտնի խոսք ասում է՝ ոչինչ մեզ այնպես չի խաբում, ինչպես մեր կարծիքը:
Ծռերի հետ դեմոնստրատիվ քաղաքական «Ճռիկները» իրենց մեջ բացասական արձագանքի վտանգ են պարունակում ոչ միայն ռուսական, այլև իրանական գործակցության դաշտում: Այս հանգամանքը կարող է ի շահ ծառայեցնել նաև Թուրքիան՝ հատկապես ռուս-թուրքական ներկայիս հարաբերությունների ֆոնին: Ի վերջո պետք չէ մոռանալ, որ 2016 թ. հուլիսին զարմանալի զուգադիպությամբ ժամանակային առումով համընկել էին Էրդողանի դեմ հեղաշրջման փորձը Թուրքիայում և ՊՊԾ գնդի զինված գրավումը Երևանում: Այս հարթության վրա էլ կան չպարզաբանված, կնճռոտ հարցեր: Միամտություն կլինի կարծել թե այս մասին էլ Նիկոլը չգիտի:
Գիտի, նույնիսկ՝ հրաշալի գիտի, պարզապես դաշնակցային հարաբերությունների կառուցակարգման բոլոր մյուս ռացիոնալ տարբերակները նրա մոտ վաղուց սպառվել են: Ինչու՞ են սպառվել, որովհետև ի սկզբանե չգիտեր՝ ուր, ինչ ճանապարհով, ինչ ռեսուրսներով և ի վերջո՝ ինչ համար է գնում: Իսկ Սենեկան դեռ 2000 տարի առաջ է ասել. «Երբ մարդ չգիտի, թե դեպի որ նավահանգիստն է ուղղվում, նրա համար ոչ մի քամի էլ համընթաց չի լինի»: