Այսօր կառավարությունը նիստում հավանություն տվեց «Նյու Իդա» ՍՊ ընկերության կողմից ներկայացված՝ Լոռու մարզի Ստեփանավան համայնքի Կաթնաղբյուր վարչական տարածքում 2,71 հեկտար ընդհանուր մակերեսով երկու հողամասում իրականացվելիք ներդրումային ծրագրին։
ՀՀ տարածքային կառավարման և զարգացման նախարար Սուրեն Պապիկյանը ներկայացրեց, որ հանքային ջրի արդյունահանման և շշալցման գործարան է կառուցվելու:
Ըստ նրա՝ ներդրումային ծրագրի ընդհանուր արժեքը շուրջ 5 մլն ԱՄՆ դոլարին համարժեք ՀՀ դրամ է, ներդրումային ծրագրի իրականացման ժամկետը՝ քաղաքաշինական փաստաթղթերը տրամադրելուց հետո՝ 18 ամիս:
ՀՀ վարչապետ Նիկոլ Փաշինյանը գոհունակություն հայտնեց, որ վերջապես հողատարածքի հարցը լուծվել է և ներդրումային ծրագիրը կիրականացվի, քանի որ ընկերությունը խնդիր ուներ միասնական հողակտոր գտնելու, որովհետև սեփականատերերը չէին ցանկանում վաճառել:
«Հիմա վստահ ենք, որ այս ներդրումային ծրագիրը իրականացվելու է, որովհետև խոչընդոտը միայն հողակտորն էր»,- ասաց Փաշինյանը:
Ս.Պապիկյանը հաստատեց, որ այժմ ոչ մի խոչընդոտ չկա:
