Համազգային թատրոնի տնօրենի պաշտոնում քիչ առաջ ընտրվեց թատրոնի դերասան, տնօրենի ԺՊ Արման Նավասարդյանը։ Հանձնաժողովը միաձայն կողմ քվեարկեց նրա թեկնածությանը։
Ի սկզբանե թատրոնի տնօրենի պաշտոնի համար 2 հոգի էին հայտ ներկայացրել, երկրորդ թեկնածուն թատրոնի դերասան Ստեփան Ղամբարյանն էր, սակայն նա ներկայացել էր մշակույթի նախարարություն, ասել, որ տունը գիշերը թալանել են, եւ չի կարող մասնակցել մրցույթին, պետք է գնա ոստիկանություն եւ ցուցմունք տա:
Համազգային թատրոնի անձնակազմը դեռեւս 6 ամիս առաջ բոյկոտեց նախկին տնօրեն եւ գեղարվեստական ղեկավար Վիգեն Չալդրանյանին, որին առանց իրենց կարծիքը հաշվի առնելու նշանակել էր մշակույթի նախկին նախարար Արմեն Ամիրյանը: Չալդրանյանը նախ հրաժարական տվեց գեղարվեստական ղեկավարի, ապա նաեւ տնօրենի պաշտոնից:
Համազգային թատրոնի անձնակազմն իրենց միջից ընտրեց թե՛ գեղարվեստական ղեկավար Նարինե Գրիգորյանին, թե՛ տնօրենի պաշտոնակատար Արման Նավասարդյանին: Ոչ մեկի համար էլ գաղտնիք չէր, որ Արման Նավասարդյանը կնտրվի տնօրենի պաշտոնում: Տնօրենի ԺՊ-ն այս ամիսների ընթացքում թատրոնի անձնակազմի հետ միասին բուռն աշխատանքներ է ծավալում, թե՛ ստեղծագործական, եւ թե՛ մնացած հարցերում թատրոնն աչքի է ընկնում իր ակտիվությամբ:
Աղբյուրը` armtimes.com
