Մոտ մեկ շաբաթ առաջ զարհուրելի հանցագործություն է կատարվել Երեւանում։ Նոր Նորք համայնքի բնակարաններից մեկում դաժանորեն սպանվել է մի ծեր կին։ Նա 84 տարեկան էր։ Անհայտ անձինք մտել են ներս, խոշտանգել տատիկին, ապա կպչուն ժապավենի միջոցով խեղդամահ են արել եւ հեռացել։ Ավելի ուշ հարեւանները հայտնաբերել են կնոջ մարմինը եւ ահազանգել ոստիկանություն։ Իրավապահները դանակի 30 հետք են հայտնաբերել կնոջ մարմնին։ Քննչական կոմիտեից դեպքի մանրամասները չեն հաղորդում։ Հայտնում են միայն, որ դեպքի կապակցությամբ քրեական գործ է հարուցվել Քրեական օրենսգրքի 104-րդ հոդվածի 1-ին մասով՝ սպանություն, որը պատժվում է 8-15 տարվա ազատազրկմամբ։ «Կատարվում են անհրաժեշտ քննչական գործողությունները առերեւույթ հանցագործություն կատարած անձին կամ անձանց հայտնաբերելու ուղղությամբ»,- հաղորդում է ՔԿ խոսնակ Նաիրա Հարությունյանը։
Մեր տեղեկություններով, որոնք ստացել ենք իրավապահ աղբյուրից, մարդասպանները մի քանիսն են եղել։ Ամենայն հավանականությամբ, սպանության նպատակը թալանն է եղել։ Նրանք կնոջը հարցրել են փողերի տեղը, բայց զոհը չի ասել, եւ նրան տանջելով սպանել են։ Բանն այն է, որ ծեր կինը որդի ուներ, որը բնակվում է Բելգիայում եւ պարբերաբար գումար էր ուղարկում մորը։ Այդ գումարն են փնտրել հանցագործները, սակայն չեն գտել։ Ոստիկանները կանչել են սպանվածի թոռնիկին, որն էլ ցույց է տվել փողի տեղը։ Ծեր կնոջ պահոցում հայտնաբերվել է 4 հազար դոլար։
