Մենք Արցախը դիտարկում ենք որպես ՀՀ մաս, մարզերից մեկը, եթե ինչ-որ մեկը փորձի խոչընդոտել ավտոերթին, կստանա համապատասխան վերաբերմունք:
Այս մասին Tert.am-ի հետ զրույցում ասաց «Սասնա Ծռեր» համահայկական կուսակցության անդամ Արեգ Կյուրեղյանը՝ անդրադառնալով հարցին՝ արդյոք չե՞ն կարծում, որ Արցախ ավոտերթ իրականացնելիս կարող են խնդիրներ առաջանալ, քանի որ օրերս ԱՀ անվտանգության խորհրդի քարտուղար Վիտալի Բալասյանն իրենց խորհուրդ էր տվել չհատել Արցախի սահմանը:
«Ես չեմ ասում, թե սադրանքների չենք սպասում կամ հակառակը: Ես ասում եմ՝ եթե որևէ մեկը փորձի խոչընդոտել մեր ավտոերթին, նա այդ քայլը կանի ՀՀ քաղաքացու նկատմամբ, ինչն անպատասխան չի մնա, իրենց որոշելու խնդիրն է»,-նշեց նա:
Անդրադառնալով դիտարկմանը՝ ավոտերթ կազմակերպելով՝ պատասխանում են Վիտալի Բալասանյանին, ով իրենց «ահաբեկիչ» էր անվանել, Արեգ Կյուրեղյանն ասաց.
«Ոչ, անկախ նրանից, նրա հայտարարությունը կլիներ, թե ոչ, միասնության ավտոերթ նախատեսում էինք իրականացնել: Ինչ վերբերում է Վիտալի Բալասանյանի հայտարարություններին, ապա Վարուժան Ավետիսյանը պատասխանել է, ավելացնելու ոչինչ չունեմ: «Սասնա Ծռերի» կողմից պատասխան տրվել է»,-շեշտեց նա:
Արեգ Կյուրեղյանը չմանրամասնեց, թե Արցախ այցի ընթացքում ինչ հարցեր են քննարկվելու, օրակարգում ինչ հանդիպումներ են լինելու, և արդյոք այցի շրջանակում քննարկվելո՞ւ են նաև Արցախում նախագահական ընտրությունների հետ կապված հարցերը:
«Ավտոերթի ամսաթվի, Արցախում մնալու օրակարգի և այլ մանրամասների վերաբերյալ կտեղեկացնենք լրացուցիչ»,-նշեց նա:
Հիշեցնենք, որ Ժիրայր Սեֆիլյանը ֆեյսբուքյան էջում գրել էր, որ նախատեսում են Միասնության ավտոերթ կազմակերպել դեպի Արցախ:
