Փաշինյան-Ալիև հանդիպումը բանակցություններ չեն, այլ քննարկումներ՝ հետագայում բանակցային սեղանի վերադառնալու մասին։ Այսօր ԱԺ-ում լրագրողների հետ զրույցում նման տեսակետ հայտնեց ԱԺ «Իմ քայլը» խմբակցության պատգամավոր Սասուն Միքայելյանը։
«Բայց ես ողջունում եմ, քանի որ քննարկումներ միշտ էլ պետք է լինեն, պետք է լինեն բանակցություններ, որովհետև պարզ ասեմ ձեզ՝ Ադրբեջանը երբեք չի եկել բանակցությունների։ Երկկողմանի քննարկումներ կլինեն, սա նորմալ է քաղաքակիրթ աշխարհում, քանի որ առանց քննարկումների հարց չի լուծվում»,- ասաց նա։
Նա, խոսելով հայ-ադրբեջանական ռազմական գործողություններ հնարավորության մասին, հաշվի առնելով նաև այն, որ ՊՆ ում օպերատիվ հավաք եղավ՝ բանակի հրամանատարների մասնակցությամբ, նշեց, թե հայկական կողմը միշտ պետք է պատրաստ լինի։
«Միշտ ասել եմ, որ մեր աշխարհագրական դիրքն այնպիսին է, որ մենք միշտ պետք է պատրաստ լինենք։ Սրան գումարած Ադրբեջանը նոր զինատեսակներ է գնում, իսկ մենք որպես իրենց հակառակորդ, պետք է միշտ պատրաստ լինենք պատերազմի։ Մենք ժամ-ժամ, վայրկյան-վայրկյան պետք է պատրաստ լինենք պատերազմի»,- ընդգծեց Սասուն Միքայելյանը։
Սասուն Միքայելյանը պատասխանեց նաև Պաշտպանության նախկին փոխնախարար Վահան Շիրխանյանի նամակի մասին հարցերին։ Ինչ վերաբերում է ՀՀ 2-րդ նախագահ Ռոբերտ Քոչարյանի ՝ Մեղրին Լաչինով փոխարինելու հատվածին, Միքայելյանը նշեց, որ այս հարցով դեռ շատ զարմանալի տեղեկություններ կիմանա հանրությունը։
Միևնույն ժամանակ նա նկատեց, որ պլանավորված է եղել Մեղրին ոչ թե Լաչինի, այլ Ղարաբաղի հետ փոխարինել։