Բրունեյում դեռևս 2014թ.-ին ներկայացված շարիաթի՝ իսլամական օրենքի վրա հիմնված Քրեական օրենսգրքում նույն սեռի ներկայացուցիչների միջև սեռական հարաբերություններն արգելող օրենք կներառվի, որը նախատեսում է մեղավորներին մահու չափ մտրակել կամ քարկոծել, իսկ գողերին՝ անդամահատել:
Ինչպես նշում է Daily Mail-ը, Բրունեյում նույնասեռականությունը նախկինում նույնպես քրեորեն պատժելի արարք է համարվել, որը մինչև 10 տարվա ազատարկում էր նախատեսում:
Շարիաթի վրա հիմնված Քրեական օրենսգրքում արդեն տեղ են գտել արտաամուսնական հղիության, ուրբաթօրյա աղոթքը չանելու և քրեորեն պատժելի այլ արարքների մասին օրենքներ, իսկ նորերն ուժի մեջ կմտնեն ապրիլի 3-ից:
Երկրի՝ 1967թ.-ին հրաժարական տված սուլթանի խոսքով՝ շարիաթի վրա հիմնված Քրեական օրենսգիրքը պետք է ընկալվի որպես «Աստծո կողմից հատուկ առաջնորդություն» և «Բրունեյի վեհ պատմության մասնիկ»:
Երկրի վարչապետ Հասսանալ Բոլկիահը հրաժարվել է տեղեկությունը մեկնաբանելուց:
Մարդու իրավունքների պաշտպանությամբ զբաղվող մի շարք կազմակերպություններ դեմ են հանդես եկել երկրում նոր օրենքների ընդունմանը՝ դրանք դաժան և մարդու իրավունքները ոտնահարող համարելով:
«Բրունեյի իշխանությունները պետք է անհապաղ չեղարկեն այդ դաժան պատիժները և վերանայեն Քրեական օրենսգիրքը՝ համապատասխանեցնելով այն մարդու իրավունքների մասին պարտավորություններին»,- ասել է Amnesty International կազմակերպության՝ Բրունեյի մասով փորձագետ Ռեյչլ Չհոա-Հովարդը:
«Մենք փորձում ենք ճնշում գործադրել Բրունեյի կառավարության վրա, բայց նաև գիտակցում ենք, որ մինչև օրենքի ուժի մեջ մտնելը շատ քիչ ժամանակ է մնացել»,- ասել է մարդու իրավունքների պաշտպանությամբ զբաղվող The Brunei Project կազմակերպության հիմնադիր Մեթյու Վուլֆը:
Բրունեյը Անգլիայի նախկին գաղութներից է, որի բնակչությունը շուրջ 440 հազար է: Սա Արևելյան Ասիայի առաջին երկիրն է, որն ազգային մակարդակով որդեգրել է շարիաթի քրեական բաղադրիչները։