Այսօր Մարդու իրավունքների պաշտպանության եւ հանրային հարցերի հանձնաժողովի նիստում ԱՆ Արսեն Թորոսյանը, հստակեցնելով բուռն քննարկումների տեղիք տված իր հայտարարությունը, հայտարարեց․ «Ես երբեք չեմ ասել` քաղցկեղի անվճար բուժում: Մենք ասել ենք` քաղցկեղի վիրահատությունների համավճարի վերացում»։ Նախարարն ընդգծեց, որ խոսքը քաղաքացու կողմից վճարվող վիրահատության գումարի 20 տոկոս համավճարի մասին է: «Ծրագրի վրա 500 միլիոն դրամի ներդրում է արվել, ինչի արդյունքում հանվել է քաղաքացիների վրա դրված օրինական բեռը: Քիմիան, ճառագայթային թերապիան, այլ դեղորայքային բուժումը դեռ կարվեն համավճարով, քանի որ դրանց մասով բեռն ավելի մեծ է»: Նա չբացառեց, որ եկող տարի այդ հարցերին էլ կանդրադառնան` համավճարը վերացնելու մասով․ «Հոգ չէ, կամաց-կամաց կհասնեն ավելիին»։ Խոսելով մանկական քաղցկեղի բուժմանը հատկացվող գումարներից, նախարարն ասաց` ստացիոնար բուժման ծառայությունների մասն է պետությունն իր վրա վերցնում, դրա համար 50 միլիոն դրամ է հատկացվել:
«Իմ քայլը» խմբակցության պատգամավոր Թագուհի Թովմասյանը մեջբերեց նախարարի խոսքը, որն ասել էր, թե այդ 50 միլիոն դրամը «լիովին» ծածկում է քիմիաթերապիայի հարցը: Պատգամավորը նախարարին հորդորեց`զգույշ օգտագործել բառերը: «Մարդու իրավունքների խիստ հարց է»,- հեգնեց նախարարը`ակնարկելով, որ իրեն ուղղված հարցերը հանձնաժողովի անվանմանը չեն համապատասխանում, եւ ասաց, որ հաստատում է իր հայտարարությունը, բայց իր բացատրածով:
