Բերեք մատների վրա բացատրեմ, թե քանի հատ մանիպուլյացիոն հնարք կիրառեց Աննա Հակոբյանը մեկ հարցազրույցում

Загрузка...

Բերեք մատների վրա բացատրեմ, թե քանի հատ մանիպուլյացիոն հնարք կիրառեց Աննա Հակոբյանը մեկ հարցազրույցում։

Հիմնական շեշտը զգացմունքայնության ու սենտիմենտների վրա էր, թե բա՝ մարդուս համարյա չեմ տեսնում, գոնե ինքնաթիռում շփվենք։ Նախ, դա Աննա Հակոբյանի ու իր ամուսնու խնդիրն է, ոչ թե հասարակության, իսկ եթե դա այդ աստիճան անհաղթահարելի է, թող ամուսնուն հորդորի այլ աշխատանք ճարել, որի դեպքում ավելի շատ կտեսնեն իրար։ Հետո, սա մանիպուլյացիա է։ Աննա Հակոբյանն իր ամուսնուն տեսնում է պարբերաբար, միայն վերջին երկու շաբաթում առնվազն մի քանի հրապարակային դրվագ կա, երբ նրանք միասին թատրոն են գնացել, միտինգի են գնացել, էլ չասեմ այն մասին, որ Աննա Հակոբյանը Կառավարությունում կաբինետ ունի։ Շատ կներեք իհարկե, բայց դատելով այն բաց տեղեկտվությունից, որ կա դաշտում, իմ կինը երևի ավելի քիչ է տեսնում ինձ, քան Աննա Հակոբյանը՝ իր ամուսնուն։

Անցնենք առաջ ու անդրադառնանք ինքնաթիռի դատարկ աթոռի հանճարեղ թեզին։ Ես չեմ մանրանա ու չեմ ասի, որ եթե արարողակարգով առաջին տիկնոջ այց նախատեսված չէ, ապա Աննա Հակոբյանը ավելորդ էր ինքնաթիռում։ Քավ լիցի՝ այր ու կին՝ մի մարմին, բայց ոչ մի արարողակարգով ու ինքնաթիռում առկա առաջին տինոջ բազկաթոռի մասին լոլոյով չի կարելի բացատրել Մարիամ Փաշինյանի առկայությունը ինքնաթիռում։ Դա որևէ կերպ հիմնավորված ու արդարացված չէ։ Եթե փաստարկն այն է, որ միևնույն է ինքնաթիռում տեղ կար, ապա նշանակում է, որ տեղ կար ցանկացած քաղաքացու համար, ով չուներ վիզայի խնդիր, որովհետև Մարիամ Փաշինյանը որևէ հավելյալ արտոնություններ չունի այս տեսանկյունից, քան Փեփռուշյան Նունուֆարը ու Պողոսյան Պետրոսը։ Տենց ազատ տեղերով լիներ, ինչու է միայն աղջկան տանում, թող ողջ գերդաստանին հերթով վոյաժների տանի։

Հարցի ֆինանսական կողմին էլ անդրադառնանք։ Աննա Հակոբյանը հպարտ դեմքով հայտարարում է, որ բոլոր ուղևորությունները, բացի նախատեսված դեպքերից, կատարվել են անձնական միջոցների հաշվին։ Նույնը հայտարարվում էր, երբ նույն Մարիամ Փաշինյանի տարեդարձի խնջույքի ֆինանսական կողմի մասին էր խոսքը, նույնը հայտարարվում է, երբ շոփինգի վերաբերյալ են հարցնում և այլն։ Սա շատ հարմար մարտավարություն է, առավել ևս, որ այս իշխանությունները, ըստ էության, պարալիզացրել են Էթիկայի հանձնաժողովի աշխատանքը ու մեծ հաշվով նոր իշխանությունները որևէ առումով թափանցիկ չեն ու հաշվետու չեն իրենց միջոցների հայտարարագրման հարցում։ Ես գիտեմ, որ Նիկոլն էլ, Աննան էլ որոշակի լեգալ եկամուտ ունեն, բայց ես եմ ու կասկածամիտ եմ, խնդրում եմ՝ ապացուցե՛ք ինձ, որ ձեր լեգալ եկամուտները բավարար են, որ դուք չբոլորած տարում համ մի 5 անգամ անձնական միջոցներով վոյաժներ անեք, համ հյուրանոցների համարների համար վճարեք, համ շոփինգներ անեք, որոնց արգասիքները, մեղմ ասած, շատ հեռու են Աննա Հակոբյանի այն հավաստիացումից, որ ցանկացած միջին խավի ներկայացուցչի համար մատչելի են, համ ծննդյան տարեդարձներ անեք, համ սնվեք, համ էլ մնացած առօրյա ծախսերը հոգաք։

Շարունակելով Աննա Հակոբյանի մանիպուլյացիաների թեման, հատուկ ուզում եմ սևեռել ուշադրություններդ նրա հարցազրույցի վերջին մասի վրա, երբ Աննա Հակոբյնը սկսեց լեռան քարոզ կարդալ մեդիաների վրա, գանգատվել ֆեյք նյուզից ու ոչ հիմնավոր քննադատությունից, օդում կախված լուրերից և այլն։ Որպեսզի մանիպուլյացիան պարզ լինի, ես անգամ չեմ անդրադառնա, որ ֆեյք նյուզեր ու օդում կախված խոսակցություններ հանրայնացնելու հարցում մեդիա դաշտի ցանկացած ներկայացուցիչ շատ հաց ու պանիր պետք է ուտի, որպեսզի ոտք գցի Աննա Հակոբյանի ամուսնու ու իրենց ընտանեկան բիզնես հանդիսացող ՀԺ-ի հետ։ Կրկնում եմ, ես դրան չեմ անդրադառնում, եկեք մի անգամ էլ դիտենք հարցազրույցը ու հաշվենք, թե քանի անգամ է Աննա Հակոբյանը մեղադրանքներ ու ակնարկներ անում նախորդ իշխանություների մասին, որոնք լայաղ չի անում ամրագրել գեթ մեկ փաստով։ Տեսե՛ք, իրեն ձեռքից բռնացրել են արդեն տասնյակին մոտեցող դրվագների վրա, երբ առնվազն հարցեր են առաջանում այն աստիճան, որ ինքը ստիպված է դիմել իշխանության քարոզչամեքենայի լոկոմոտիվ Հանրայինին, էդ փաստերը ծփում են ֆեյսբուքում ու մամուլում, բայց ինքը անմեղ դեմքով գալիս ու սկսում է մեղադրել նախկիններին՝ չբերելով և ոչ մի փաստ, ոչ մի ապացույց և էդ ամեն ինչը համեմում, որ видите ли, ես էլ եմ լրագրող ու սրտացավ եմ, թե ինչ թույլ են մեր լրագրողները ու ինչ քխն է մեր մեդիա դաշտը։

Տիկին Հակոբյա՛ն, այդքան սրտացավ եք ֆեյքնյուզերով, մեդիա մանիպուլյացիաներով ու լրագրողական մակարդակով, ապա բարի եղեք ու սկսեք սրական օրինակ ծառայել ձեր մասով, եթե Ձեզ դիտարկենք որպես լրագրողական համայնքի ներկայացուցիչ, իսկ եթե Ձեզ դիտարկենք, որպես վարչապետի կին, ապա խորհուրդ եմ տալիս հաթաթաներ ու կներեք, բայց կռուտիտներ անելու փոխարեն, պարզապես մի քիչ զսպել Ձեզ ու Ձեր ամբիցիաները և գոնե մնացեք Ձեր իսկ ու Ձեր ամուսնու գծած այն սահմաններում, որոնք առկա էին մինչև ձեր գերդաստանի իշխանության գալը։

Կոնստանտին Տեր-Նակալյանի գրառումը

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

Загрузка...