Առաջիկա ամիսներին մեծ կռիվ է սպասվում ընդդեմ Նիկոլ Փաշինյանի.«Շաբաթ»

Загрузка...

«Շաբաթ» օրաթերթը գրում է, որ վերջերս Արամ Զավենի Սարգսյանը իր հարցազրույցներից մեկում հայտարարեց, որ ինքը ո՛չ օլիգարխիայի կողմից է ընդունվում յուրային, ո՛չ էլ փաշինյանական թևի կողմից:

Նախ այդ քաղաքական մեկուսացման հայտարարությունը այդքան էլ անկեղծ չէր, քանի որ Վազգեն Սարգսյանի հիշատակի արարողությունների ժամանակ Արամ Սարգսյանը ակնհայտ ցույց տվեց իր մտերմությունն ու զորակցությունը Սերժ Սարգսյանին:

Բանն այն է, որ Սերժ Սարգսյանը Եռաբլուրում չէր կարող մասնակցել Վազգեն Սարգսյանի հիշատակի արարողությանը, քանի որ երևանյան միջոցառումները «վերցված» էին ներկայիս իշխանությունների կողմից: Ահա թե ինչու Սերժ Սարգսյանը երկար մնաց Ստեփանակերտում, և այնտեղ կազմակերպվեց այդ կարևոր հիշատակի արարողությունների երկրորդ ֆրոնտը, և Սպարապետի եղբայրը իր ներկայությամբ ծանրակշիռ դարձրեց այդ երկրորդ բևեռը, ինչը այս օրերին մեծ աջակցություն էր Սերժ Սարգսյանին:

Ըստ մեր տեղեկությունների՝ Ստեփանակերտում Սերժ Սարգսյանը լավության տակ չմնաց և լուծեց Արամ Սարգսյանի մեկուսացման հարցը՝ այդ թվում հանձնարարեց Էդմոն Մարուքյանին «բարիշել» Արամ Զավենիչի հետ:

Հիշեցնենք, որ Արամ Սարգսյանի և Էդմոն Մարուքյանի հարաբերությունները վատացել էին այն բանից հետո, երբ Էդմոն Մարուքյանը խորհրդարանական ընտրություններից առաջ դավաճանեց իր դաշնակցին. «Լուսավոր Հայաստանը» Արման Բաբաջանյանի հովանավորներից և այլ աջակցություն ստանալով՝ լքեց «Լույս» դաշինքը, որը հաջողությամբ մտել էր Երևանի ավագանի: Այս քաղաքական դավաճանությունից հետո Սերժ Սարգսյանը կարողացավ «բարիշացնել» երկու նախկին դաշնակիցներին՝ բացատրելով նրանց, որ առաջիկա ամիսներին մեծ կռիվ է սպասվում ընդդեմ Նիկոլ Փաշինյանի, և նրանք պետք է միավորվեն հանուն ավելի մեծ խաղի:

Այս մեծ կռվի նախաշեմին Սերժ Սարգսյանի հորդորով Արամ Զավենիչը մի կողմ է թողել նաև իր բացասական զգացմունքներըյուր վաղեմի թշնամու՝ Ռոբերտ Քոչարյանի դեմ և արդեն սկսել է իր հրապարակային ելույթներում ջուր լցնել օլիգարխիայի ջրաղացին:

Շիրխանյան- Քոչարյան հակամարտության ժամանակ նա կոնկրետ սկսեց հարվածել Շիրխանյանին՝ դարձյալ օգնելով քոչարյանական թևին:

Այսպիսով՝ քոչարյանա-սարգսյանական ճամբարին միացավ ևս մեկ ճանաչված և մաքուր հետագիծ ունեցող գործիչ: Սերժ Սարգսյանի և Ռոբերտ Քոչարյանի կողմից հայտնի գործիչների հավաքագրումը այս տեմպերով շարունակվելու դեպքում, շուտով իշխանության կողմից անուշադրության մատնված բոլոր հրապարակային գործիչները կհայտնվեն քոչարյանա-սարգսյանական ճամբարում:

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

Загрузка...