«Թալանը հո էն չի՞, որ մտնում են տուն, դիվանը տանում, թալանը է՛ս ա»

Նոր Հայաստանի հինգ մարզպետ որոշել է ամանորյա տոներից առաջ պարգևատրել մարզպետարանի որոշ աշխատակիցների, և նրանցից չորսը նաև ինքնապարգևատրվել է:

Քննարկումների մի կողմը սա օրինաչափ է համարում՝ «Լավ են արել, ինքնապարգևատրվել են, ձեր աչքն էլ հանել են, ձեզնի՞ց պետք է հարցնեն»: Մյուս մասն իսկապես վստահ է, որ ժողովրդից պե՛տք է հարցնել. «Բա Փաշինյանը չէ՞ր ասողը, որ ժողովուրդն է որոշում կայացնողը»:

Ինձ համար իսկապես հետաքրքիր է Նիկոլ Փաշինյանի գնահատականը: Սակայն այս հարցին առայժմ վարչապետը չի անդրադարձել: Քաղաքացու հետ իր վերջին զրույցում նա հայտարարեց գեղեցիկ ֆլեշմոբ և կարդաց Սիլվա Կապուտիկյանի «Հայոց աշխարհ» բանաստեղծությունը:

ԱԺ-ի «Իմ քայլը» խմբակցության ղեկավար Լիլիթ Մակունցն է անդրադարձել այս խնդրին՝ ասելով, որ այն, ինչը օրինաչափ է և սահմանված է օրենքով, ինքը դեմ լինել չի կարող:

Օրենքը

Նախ, Մակունցի ասած, «օրենքով է կարգավորվում հարցը» հիշեցրեց ՀՀԿ-ականների պատասխանը՝ Ս. Սարգսյանի երրորդ ժամկետի վերաբերյալ: Գալով օրենքին՝ նշենք, որ այս հարցը կարգավորում է «Պետական պաշտոններ զբաղեցնող անձանց վարձատրության մասին»օրենքի 22-րդ հոդվածը: 

Համաձայն որի՝ անձը պարգևատրվում է կիսամյակային հաշվետվության հիման վրա: Սա նշանակում է, որ չի կարող պարգևատրվել կամ ինքնապարգևատրվել անձը, ով 2.5 ամիս է աշխատել: Տվյալ դեպքում խոսքը Սյունիքի, Արմավիրի և Վայոց ձորի մարզպետների մասին է (նաև մարզպետարանների բոլոր այն աշխատակիցների՝ փոխմարզպետներ, օգնականներ, խորհրդականներ, որոնք չունեն կիսամյակային ստաժ): Հիշյալ երեք մարզպետներն, օրինակ, աշխատանքի են անցել հոկտեմբերի կեսերին, իսկ դեկտեմբերի վերջին ինքնապարգևատրվել են:

Պարգևատրման համար նաև օրենքը կոնկրետ հիմքեր է մատնանշում: Այդ հիմքերը հրապարակված չեն, հանրությանը հայտնի չեն:

Հին պրակտիկան, որ ամենամյա պարգևատրումներ են եղել, հիմք լինել չի կարող, դրանք չեն կարող ավանդույթի ուժով շարունակվել, եթե երկրում իրավիճակ է փոխվել:

Ի վերջո, նոր Հայաստան հայտարարությունների մակարդակով չի կառուցվում: Մարզպետներից մեկն, օրինակ՝ Գարիկ Սարգսյանը, հայտարարում էր, որ ինքը հրաժարվում է ծառայողական մեքենայից և աշխատանքի կգնա հեծանիվով, հիմա նա 104 տոկոսով է պարգևատրել ինքն իրեն, այն դեպքում, երբ օրենքում պարգևատրման նման չափ գոյություն չունի:

Եվ ընդհանրապես «պարգևատրում» եզրույթին օրենքը շատ գեղեցիկ ձևով սահմանում է տալիս: Եթե գումարի դուրսգրումը այդ սահմանմանը չի համապատասխանում, դա դադարում է «պարգևատրում» համարվելուց, անկախ նրանից՝ ինչ են դրել անունը կամ օրենքի ինչպիսի հղում են արել:

Կոնկրետ դեպքը պարգևատրում որակելը սխալ է: Մարդիկ գումար են դուրս գրել, միգուցե վերցրել են, բայց սա պարգևատրում չէ: Այս դեպքում հարց է առաջանում՝ ի՞նչ է տեղի ունեցել:

ՀՀ վարչապետ Նիկոլ Փաշինյանն իր ելույթներից մեկում (2015 թ.) փայլուն կերպով տալիս է այս հարցի պատասխանը:

«Բա թալանը ո՞նց է լինում: Որ ասում ենք՝ ՀՀ իշխանությունները ժողովրդին թալանում են, հո նկատի չունենք, որ Սերժ Սարգսյանն ու Հովիկ Աբրահամյանը մտնում են մեր տները, մեր դիվանը ամենքը մի ծերից բռնում տնից դուրս ա հանում… բա թալանն էս ա»:

Տվյալ դեպքում ևս մենք նկատի չունենք, թե տվյալ պարոնայք մտել են մեր տուն, գողություն են արել, բայց գումար են վերցրել, որ պարգևատրում չէ: Այդ գումարը վերցրել են պետական գանձարանից: Ինչո՞ւ են վերցրել: Այս հարցի պատասխանը պետք է ստանա հանրությունը:

Տեղի ունեցածը թալան է

Արդյո՞ք տեղի ունեցածը թալան է: Եթե ոչ, ուրեմն պարոն վարչապետը պետք է բացատրի, թե ինչու մի դեպքում թալան որակելը ճիշտ է, մյուսում սխալ: Եթե սա թալան է, ուրեմն ի՞նչ քայլեր ու հետևություն պետք է արվի: Այս հարցի պատասխանը ևս Փաշինյանի ելույթների մեջ կա: Ամռանը Տավուշի մարզում վարչապետը համայնքների ղեկավարների հետ հանդիպման ժամանակ հենց այս դեպքերի մասին էր հիշատակում՝ ասելով, որ թալանը չի հանդուրժելու:

«Եթե ուզում ենք բյուջեն մեծանա, ապա պետք է արդյունավետ օգտագործենք այն: Այս վիճակը չի հանդուրժվելու: Ես չեմ ուզում լարվածություն լինի, բայց նրանք, ովքեր հին տրամաբանությամբ կշարունակեն, կներեք, ոչ մի բան չենք կարող անել, ստիպված ենք լինելու բռնել: Մենք չենք կարող հանդուրժել թալանը»,- ասում էր Փաշինյանն ամռանը:

Չպետք է հանդուրժել թալանը: Եվ ընդհանրապես «ընտրակաշառք, կաշառք վերցնողի ձեռքը պետք է կտրել» Փաշինյանի ձևակերպումն այս դեպքերի համար էլ է գործելու:

Առանց հիմքերի վերցնողի, գումարը դուրս գրողի, թալանողի, կաշառք և ընտրակաշառք վերցնողի ձեռքը պետք է կտրել՝ չակերտների մեջ: Պետք է «կտրել» հենց այսօր, երբ հեղափոխությունից հետո պետականաշինության հիմքեր գցելու հույսեր դեռ կան: Այս մարդիկ առնվազն պետք է բացատրեն ժողովրդին, թե ինչու են որոշել պարգևատրել իրենք իրենց: Ի՞նչ են փոխել Արմավիրում, Տավուշում, Արարատում, Սյունիքում ու մյուս տեղերում: Որքանո՞վ է պակասել աղքատությունը: Այլապես, «եթե ինձնից առաջինները ստացել են, ես էլ պետք է ստանամ» ձևակերպումը կործանում տանող է:

Ի վերջո, իրավականից բացի հարցը շատ ավելի կարևոր կողմ ունի՝ բարոյականը: Եթե հանրությունը և այսօրվա իշխանությունը նախկիններին քննադատում էր ավելորդ «ճոխությունների», երկիրը թալանելու համար, արժե՞ր արդյոք այդ ֆոնի վրա 100%-ոց պարգևատրումներ շնորհել սեփական անձին ու մերձավոր շրջապատին՝ միևնույն ժամանակ հայտարարելով, թե նախկիններն ի չարս էին տրամադրված, մենք՝ ի բարին»:

Պետությունից անհիմն վերցրածը պետք է վերադարձնել պետությանը, սա առնվազն, և բացատրել հանրությանը, որ տեղի ունեցածը թյուրիմացություն է, և շարունակել աշխատել: Այլապես լռել կնշանակի պարտակել, լեգիտիմացնել, քարտ բլանշ տալ, գցել թալանի ու կոռուպցիայի հիմքեր:

Նախկին ռեժիմը հենց խարսխված էր այս արժեքների վրա: Իսկ Սերժ Սարգսյանը մշտապես հայտարարում էր՝ թղթերով ամեն ինչ նորմալ է:

Քրիստինա Մկրտչյան

galatv.am

«Քրեական գործ է հարուցվել պոռնոտեսանյութերի արտադրությամբ և տարածմամբ զբաղվող տրանսվեստիտի կողմից մանկապարտեզներ այցելելու մասին ԱԱԾ ուղարկված իմ դիմումի կապակցությամբ».Նարեկ Մալյան

26.05.2020

Նիկոլ Փաշինյանի հրաժարականի խոսքը

28.05.2020

Երևանում օրգազմի մասին պատմող գրքեր են բաժանել երեխաներին

25.05.2020

«Հիմա, էդ դիմակը դրած լայվ ես մտնում, որ ի՞նչ ապացուցես՝ որ ո՞ւղտ չես․․․».Մարգարիտ Եսայանը՝ Փաշինյանին

25.05.2020

Կապանում ճակատ-ճակատի բախվել են Lexus-ն ու Нива-ն. կա վիրավոր

30.05.2020

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով