ՀՀ ԱԳՆ-ն չհասավ իր նպատակին. Հայաստանը կմնա մոնիտորինգի տակ.168.am

Загрузка...

Փարիզում տեղի է ունեցել ԵԽ ԽՎ մոնիտորինգի հանձնաժողովի նիստը, որի ընթացքում ուշագրավ անդրադարձներ են եղել Հայաստանի ընտրություններին և հետընտրական հնարավոր զարգացումներին։

Մասնավորապես, Հայաստանի արտաքին գործերի նախարարությունը (ԱԳՆ), ոգևորված լինելով «Իմ քայլը» դաշինքի հաղթանակով, փորձ է արել ԵԽ ԽՎ պատգամավորներին առաջարկել Հայաստանը՝ որպես երկիր, մոնիտորինգի տակ գտնվելուց հանելու և տեղափոխելու պոստմոնիտորինգային երկրների դասին, ինչը բուռն հակազդեցության է արժանացել հանձնաժողովի նիստին ներկա պատգամավորների և քաղաքական խմբերի ղեկավարների կողմից, և նրանք փաստել են, որ, թեպետ ընտրական, այդ թվում՝ ԱԺ արտահերթ ընտրությունների գնահատականներն ընդհանուր առմամբ դրական են եղել, բայց դեռ շատ վաղ է խոսել Հայաստանում կայուն ժողովրդավարության մասին, և հետևաբար՝ ԵԽ ԽՎ մոնիտորինգը չի դադարելու Հայաստանի հանդեպ։ Այդպիսով, ՀՀ ԱԳՆ-ն չի հասել իր նպատակին։

ԵԽ ԽՎ պատգամավորները, որոնք եղել են նաև դիտորդական առաքելության կազմում, ասել են, որ թեպետ, այո, ընտրություններն ընդհանուր առմամբ դրական գնահատականների են արժանացել, բայց եղել են նաև ընտրությունների «մութ» կողմեր, մասնավորապես՝ համատարած հակաքարոզչություն քաղաքական ընդդիմախոսների հանդեպ, ատելության խոսքի անթույլատրելի մակարդակ, Հանրապետական կուսակցության (ՀՀԿ) ներկայացուցիչների հանդեպ սպառնալիքների հնչեցում։

Նաև ասվել է, որ ԱԺ արտահերթ ընտրություններում 70%-ը, իհարկե, աջակցության բարձր ցուցանիշ է, բայց մտավախություն է առաջացնում այն հանգամանքը, որ այդ 70%-ը կարող է քաղաքական վրեժխնդրության հիմք դառնալ, և ոչ թե՝ ծառայել Հայաստանում ժողովրդավարության ամրապնդմանը։

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

Загрузка...