ՀՀ ԱԺ պետական-իրավական հարցերի մշտական հանձնաժողովը հոկտեմբերի 19-ի նիստում Գեւորգ Կոստանյանի նախագահությամբ առաջին ընթերցմամբ քննարկել է Կառավարության հեղինակած «ՀՀ ընտրական օրենսգիրք» ՀՀ սահմանադրական օրենքում փոփոխություններ եւ լրացումներ կատարելու մասին», «Հանրաքվեի մասին» ՀՀ սահմանադրական օրենքում փոփոխություն կատարելու մասին», «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» եւ «Պաշտպանության մասին» ՀՀ օրենքում լրացում կատարելու մասին» օրինագծերի փաթեթը:
Գեւորգ Կոստանյանը հորդորել է գործընկերներին հարցին անդրադառնալ ոչ թե քաղաքական նպատակահարմարության, այլ իրավական հարթությունում` կարեւորելով փոփոխությունների իրավական անհրաժեշտությունն ու իրավական երաշխիքները:
ՀՀ արդարադատության նախարար Արտակ Զեյնալյանը նշել է, որ ընտրական օրենսդրության բարեփոխումների կարեւորագույն նպատակն է Հայաստանում ժողովրդավարական ընտրական ինստիտուտի կայացումը եւ Սահմանադրությամբ երաշխավորված ընտրական իրավունքի ապահովումը: Փոփոխություններն անդրադառնում են մի շարք հիմնարար խնդիրների՝ թեկնածուների տարածքային ցուցակների վերացում, պարզ համամասնական ընտրակարգի ընդունում, կոալիցիաների ձեւավորման սահմանափակումների վերացում եւ ժամկետների ընդլայնում՝ 6 օրվա փոխարեն 10 օր, կուսակցական բազմակարծության ապահովման նպատակով ընտրվելու նվազագույն շեմի իջեցում կուսակցությունների համար՝ նախատեսված 5-ի փոխարեն 4 տոկոս, ընտրագրավի գումարի իջեցում եւ նվազագույնը 4 կուսակցությունների (կուսակցությունների դաշինքների) ընտրության երաշխիքների ապահովում, կանանց ներկայացվածության քվոտայի բարձրացում՝ գործող 25 տոկոսի փոխարեն նախատեսելով 30 տոկոս, Երեւանի, Գյումրու եւ Վանաձորի ավագանու ժամանակ բոնուսային համակարգի վերացում: Լրացուցիչ մեխանիզմներ են նախատեսված ընտրողների ցուցակների կազմման եւ վարման գործընթացի արդյունավետության բարձրացման նպատակով, դատարանի կողմից անգործունակ ճանաչված անձանց ընտրողների ցուցակից հանելու համար: Նախատեսվում է օրենսդրորեն ամրագրել համապետական ընտրությունների ժամանակ Հանրային հեռուստատեսությամբ հեռուստաբանավեճերի կազմակերպումը, ավելացնել Հայաստանի հանրային ռադիոյով եւ հեռուստատեսությամբ անվճար եթերաժամանակի քանակը եւ կուսակցությունների նախընտրական ծրագրերի լուսաբանում: Նախատեսվում է ապահովել զորամասերում քարոզչության հավասար պայմաններ:
Պատգամավորներն իրենց հարցադրումներում անդրադարձել են 4-րդ ուժի համար նվազագույնը 2% շեմ սահմանելուն, բաց համամասնական ընտրակարգին անցմանը, կանանց ներկայացվածության քվոտայի բարձրացման նպատակահարմարությանը, ֆիքսված տեսանկարահանման կարեւորությանը եւ այլ հարցերի:
Արտակ Զեյնալյանը հավաստիացրել է, որ Կառավարությունը պատրաստ է համագործակցել խորհրդարանի հետ:
Աշխատանքային ձեւաչափում քննարկումների արդյունքում Կառավարության ներկայացուցչի համար ընդունելի են եղել ֆիքսված տեսանկարահանման եւ 4-րդ ուժի համար նվազագույնը 2% շեմ սահմանելուն վերաբերող առաջարկները: Ընդունվել է նաեւ ՀՀ ԱԺ պատգամավոր Խոսրով Հարությունյանի՝ կուսակցությունների եւ կուսակցությունների դաշինքների կողմից ներկայացվող կառուցվածքի եւ կազմի հրապարակմանը վերաբերող առաջարկը, որն ուժի մեջ կմտնի օրենսգրքի փոփոխություններն ուժի մեջ մտնելուց հետո մեկ տարվա ընթացքում:
Օրենսդրական փաթեթն արժանացել է հանձնաժողովի դրական եզրակացությանը:
Նույն օրը ՀՀ ԱԺ տնտեսական հարցերի մշտական հանձնաժողովը Խոսրով Հարությունյանի նախագահությամբ կայացած նիստում քննարկել եւ ի գիտություն է ընդունել Հայաստանի Հանրապետության տնտեսական մրցակցության պաշտպանության պետական, ինչպես նաեւ հանրային ծառայությունները կարգավորող հանձնաժողովների 2019 թվականի տարեկան գործունեության ծրագրերը:
ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանի տեղեկացմամբ` ծրագրում ներկայացված են ամփոփ տեղեկություններ տնտեսական մրցակցության իրավիճակի վերլուծության եւ առկա հիմնախնդիրների բացահայտման, տնտեսական մրցակցության պաշտպանության միջոցառումների եւ դրանց իրականացման ժամանակացույցի վերաբերյալ: Փաստաթղթում ներառված է նաեւ տնտեսական մրցակցության կարգավորման մեխանիզմներին, մրցակցային իրավիճակի բարելավմանն ուղղված առաջարկներին, օրենքով սահմանված խնդիրների եւ գործառույթների իրականացմանն առնչվող տեղեկատվություն: Ըստ Արտակ Շաբոյանի՝ ծրագրի նպատակներն են` պաշտպանել եւ խրախուսել ազատ տնտեսական մրցակցությունը ապրանքային շուկաներում, խթանել մրցակցային մշակույթը, նպաստել սպառողների շահերի պաշտպանությանը:
ՀՀ հանրային ծառայությունները կարգավորող հանձնաժողովի նախագահի տեղակալ Միքայել Սողոմոնյանը, ներկայացնելով գործունեության ծրագիրը, նշել է, որ կառույցը գալիք տարի, շարունակելու է հետամուտ լինել կարգավորվող ոլորտների իրավական ակտերի լրամշակման աշխատանքներին:
ՀՀ ԱԺ տնտեսական հարցերի մշտական հանձնաժողովը երկրորդ ընթերցմամբ քննարկել եւ դրական եզրակացություն է տվել «Լիցենզավորման մասին» ՀՀ օրենքում փոփոխություն կատարելու մասին» օրենքի նախագծին:
«Վիճակախաղերի մասին» ՀՀ օրենքում լրացումներ կատարելու մասին» եւ «Գովազդի մասին» ՀՀ օրենքում լրացումներ եւ փոփոխություններ կատարելու մասին» օրենսդրական փաթեթների քննարկումը հետաձգվել է:
