Արաբկիրի զբոսայգուց, դեպի Հրազդանի կիրճ իջնող ճանապարհի աջ կողմում գտնվող Սուրբ Մարիամ Աստվածածնի մատուռը բացառիկ է նրանով, որ ոչ թե կառուցվել է բարերարների շնորհիվ, այլ տեղաբնակ տղամարդկանց ներդրումների և ձեռքի շնորհքի միջոցով:
Նախաձեռնության հեղինակները դեռ շարունակում են իրագործել, նախկինում աղբավայրի վերածվող տարածքի բարեկարգման հետ կապված իրենց պլանները:
Այսօր՝ հոկտեմբերի 19-ին, Արարատյան Հայրապետական թեմի Արաբկիր համայնքի հոգևոր հովիվ տեր Բաբկեն քահանա Հայրապետյանի նախաձեռամբ, Աստվածածնի մատուռում կատարվեց սրբապատկերի օրհնության արարողություն:
Նույն մատուռի բակում, կատարվեց նաև նոր տեղադրված խաչքարի օրհնության արարողություն:
Այնուհետև արարողության մասնակիցներն այցելեցին մատուռից ոչ հեռու, Համո Սահյան և Մալխասյանց փողոցների խաչմերուկում գտնվող, տեղի բնակիչների ջանքերով, աղբից մաքրված, կառուցապատումից ազատագրված, բարեկարգված անկյունը, որտեղ ևս կատարվեց նոր տեղադրված խաչքարի օրհնության արարողություն:
Ֆոտոլրագրող՝ Հայկ Կիսեբլյան